Ra’iisul Wasaaraha Soomaaliya, Xamse Cabdi Barre, ayaa ugu baaqay saaxiibada caalamka ee taageera Soomaaliya inay ula dhaqmaan maamulka SSC-Khaatumo si lamid ah maamul-goboleedyada kale ee xubnaha ka ah dowladda Federaalka Soomaaliya.

Raysal wasaare Xamse ayaa hoosta ka xarriiqay in deegaanada SSC-Khaatumo aysan ahayn kuwo lagu muransan yahay, isagoo sheegay inay yihiin dhul Soomaaliyeed oo ka tirsan dowladda Federaalka.

Ra’iisul Wasaaruhu waxa uu xusay in dowladda ay hoggaamiyaan ay qaadday tallaabo geesinimo leh oo ay ka baaqsadeen madaxweynayaal iyo ra’iisul wasaayaal hore, kuwaas oo ku guul-darraystay inay si cad u aqoonsadaan jiritaanka SSC-Khaatumo.

“Waxaan rabaa inaan iraahdo, madaxweynayaal iyo raysal wasaarayaal badan oo xaafadda ah ayaa Khaatumo la noolaa xilliyadeedii adag iyo duruufihii ay ku jirtay. Qaar baa warqado qoray oo dhahay ‘Khaatumo waan aqoonsannaynaa’, haddana way ka laabteen. Qaar kalena waxay yiraahdeen: ‘Waa su’aal adage, naga daaya.’ Aniguse warqaddii waan qoray, mana jeex jeexin. Waxaan u dhiibay Axmed Macallin Fiqi, anigoo ku dhahay sheeg,’” ayuu yiri Ra’iisul Wasaare Xamse.

Xamse Cabdi Barre waxa uu sheegay in SSC-Khaatumo oo ka qayb gasha shirarka Golaha Wadatashiga Qaranka ay dalka kusoo kordhinayso talo, aragti iyo caqli muhiim u ah midnimada iyo masiirka Soomaaliya.