Ugu yaraan siddeed qof oo rayid ah oo Soomaali ah, oo ay ku jiraan haween iyo carruur, ayaa lagu dilay weerar hubaysan oo ka dhacay deegaanka Malkamari ee gobolka Dawa, koonfurta Itoobiya, meel u dhow xuduudda Kenya.

Weerarka oo la sheegay in ay fuliyeen maleeshiyaad hubaysan oo Oromo ah ayaa dhacay xilli dadka deegaanka oo u badan xoolo-dhaqato ay hurdeen. Maleeshiyaadka ayaa la sheegay inay gudaha u galeen deegaanka, kadibna ay rasaas ku fureen dadka rayidka ah, taasoo sababtay dhimashada ugu yaraan siddeed qof.

Mas’uuliyiinta deegaanka ayaa maleeshiyaadka Oromada ku eedeeyay inay ka dambeeyeen weerarka, inkasta oo aan weli si madax-bannaan loo xaqiijin dhammaan faahfaahinta dhacdada.

Weerarkan ayaa kusoo beegmaya xilli ay sii xoogeysanayaan xiisadaha iyo iska horimaadyada u dhexeeya bulshada Soomaalida iyo Oromada ee koonfurta Itoobiya, gaar ahaan deegaannada ku dhow xuduudda Kenya.

Rabshadaha ka socda gobolka ayaa sidoo kale sababay barakac baahsan. Mas’uuliyiin Kenyan ah ayaa sheegay in dagaallada dhinaca Itoobiya ay saameeyeen dadka ku nool deegaannada xuduudda, iyadoo kumannaan qof ay ka barakaceen guryahooda, qaar kalena ay u gudbeen gudaha Kenya iyagoo raadinaya badbaado.