Boqolaal qof oo shacab ah ayaa maanta bannaanbax ka dhigay magaalada Beledweyne ee xarunta gobolka Hiiraan, iyaga oo ka jawaabaya baaq uu Khamiistii soo saaray Ugaas Yuusuf Ugaas Xasan.

Muuqaallo lagu baahiyay baraha bulshada ayaa muujinaya dadweyne tiro badan oo isugu soo baxay waddooyinka magaalada, kuwaas oo muujinaya dhaqdhaqaaq la xiriira xaaladda siyaasadeed ee gobolka Hiiraan.

Bannaanbaxa ayaa ku soo beegmaya xilli magaalada Beledweyne uu ku sugan yahay wafdi ka socda dowladda Federaalka Soomaaliya, kuwaas oo magaalada gaaray toddobaadkii hore, si ay waanwaan uga dhex sameeyaan Ugaaska iyo qaar ka mid ah siyaasiyiinta gobolka Hiiraan.

Khilaafka ayaa salka ku haya doorashadii dhowaan ka dhacday magaalada Jowhar, taas oo dib loogu doortay Madaxweynaha Hirshabeelle, Cali Guudlaawe Xuseen, hase yeeshee ay qaadaceen qaar ka mid ah siyaasiyiinta gobolka Hiiraan.

Weli faahfaahin rasmi ah lagama hayo ujeeddada gaarka ah ee bannaanbaxa iyo jawaabta dowladda Federaalka ee xaaladda ka taagan Beledweyne.