Waxaa maanta oo talaado ah lagu wadaa in teendhada Afisiyooni ee magaalada Muqdisho lagu qabto doorashada guddoonka Aqalka sare ee Baarlamaanka federaalka, waxaana doorashada ku tartamaya musharaxiin badan oo saameyn leh.
Xubnaha guddiga qaban qaabada doorashada guddoonka Aqalka Sare ayaa gaaray teendhada Afisiyooni ee lagu wado in ay ka dhacdo doorashada, waxaa sidoo kale lagu wadaa in halkaasi gaaraan senatarada Aqalka Sare ee wax dooranaya.
Ammaanka wadooyinka gala garoonka diyaaradaha Aadan Cadde ayaa si weyn loo adkeeyay , waxaana sidoo kale ammaanka teendhada doorashada ka dhaceyso si weyn u adkeenayaa ciidamo katirsan howlgalka ATMIS.
Musharaxiinta u taagan xilka guddoonka gollaha Aqalka Sare ayaa saacadihii lasoo dhaafay waday olole aad u xoogan, waxaana xubnahan siyaabo kala duwan codadka u weediisanayeen senatarada guddoonka ku tartamaya.
Doorashada Guddoonka waxaa ku tartamaya musharaxiinta kala ah
Guddoomiyaha Aqalka Sare
- Sen. Saalax Axmed Jaamac oo hadda ah Wasiirka Dastuurka XFS.
- Sen. Cabdi Xaashi Cabdullaahi oo ahaa Guddoomiyihii hore ee Aqalka Sare.
- Sen. Cusmaan Abokor Dubbe oo ah Wasiirka Warfaafinta XFS.
Guddoomiye ku xigeenka koowaadÂ
- Sen. Cabdixakiin Macalin Axmed.
- Sen. Cali Shacbaan Ibraahim.
Guddoomiye ku xigeenka labaadÂ
- Sen. Ilyaas Badel Gaboose.
- Sen. Cabdullaahi Sheekh Ismaaciil (Fartaag)
- Sen. Cabdullaahi Cali Xirsi ( Tima Cadde)
- Sen. Cabdi Cusmaan Xareed
- Sen. Sareedo Maxamed Xasan Jeyte
- Sen. Cabdiweli Maxamed Ibraahim (Xaabsade)
- Sen. Xasan Xuseen Xaaji.
