Madaxweynaha dowlad goboleedka Puntalnd, Mudane Saciid Cabdullahi Deni ayaa markii ugu horreysay si faah-faahsan uga hadlay heshiiska Golaha Wadatashiga Qaran ee 27-kii bishaan lagu gaaray gudaha xarunta Villa Soomaaliya.
Madaxweynaha Puntland ayaa tilmaamay in dalka loo wado meel qaldan, isla-markaana ay tahay sababta ay horay ugu diideen ka qayb-galka shirarka Golaha Wadatashiga Qaranka.
“Puntland qayb kama ahan go’aanadii soo baxay, kuwii hore waxaa uga baaqsanay oo aan u saxiixi weynay waxaan aragnay in dalka meel qaldan loo wado,” ayuu yiri Saciid Deni.
“Dastuurka Puntland waxaa uu na farayaa in aan si gaar ah u dhaqano inta dawlad Soomaaliyeed oo miyir qabta laga helayo,” ayuu mar kale yiri madaxweynuhu.
Saciid Deni oo hadalkiisa sii wata ayaa si weyn uga soo horjeestay baabi’inta xilka ra’iisul wasaaraha, isaga oo ku eedeeyay madaxweyne Xasan Sheekh inuu horay ula wareegay guud ahaan shaqadii uu lahaa xafiiska ra’iisul wasaaraha, sida uu hadalka u dhigay.
Ugu dambeyn wuxuu soo jeediyay haddii la rabo in la xaliyo xasillooni la’aanta Soomaaliya in mar hore Somaliland ay miiska timaado oo xalka wadajir loo raadiyo.
