Ciidanka Xoogga Dalka, Daraawiishta Galmudug iyo Ciidanka Difaaca Shacabka ee la abaabulay ayaa weli laba jiho kaga sii gurguuranaya deegaanka Caad ee koonfurta Gobolka Mudug.
Ciidamadan oo si taxadar leh ugu socdo waddada ayaa iska caabin kala kulmaya maleeshiyada Al-Shabaab ee dhulka jiqda ah ku jira, iyadoo sidoo kalena ay caqabado ka haystaan miinooyinka ku aasan waddada.
Maleeshiyada Shabaabka ayaa la sheegaya in ay difaacyo dhirarsan kaga jiraan tuulooyinka Jeex-jeexa, Yacgoos illaa aagga Dhagaxdheer, isla-markaana ay dhooban yihiin dhulka hawdka ah ee halkaasi ku yaala.
Dhulka lagu dagaalamayo oo dhul buuraley, hawd iyo miyiba leh ayaa qayb ka ah waxyaabaha sababay in hawlgalku uu gaabis noqdo.
Ilo wareedyo ayaa sheegaya in hawlgalka ay Arbacadii ku biireen cutubyo ka tirsan Guutada Abuu Dujaana iyo Kumaandooska Danab ee Xoogga Dalka.
Ciidamadan oo dagaalka ka soo galay dhanka hawdka ee deegaanka Shabellow ayaa hujuumaya Jeex-jeexa, oo haddii ay la wareegaana ay waddo u furi karto qabsashadooda Caad.
Taliyaha Ciidanka Dhulka ee Xoogga Dalka, Korneyl Dayax Cabdi Cabdulle oo ku sugan koonfurta Gobolka Mudug ayaa sheegay in Al-Shabaab laga saaray dhul ballaaran oo hawdka ah, ciidamaduna ay kulaalayaan deegaanka Caad, oo sida uu yiri ay wax yar u jiraan.
“Runtii meelaha laga saarayna xabaalo wadareedyo ay maleeshiyaadkoodu ku aaseen baa laga heli karaa,” ayuu yiri Taliyaha.
Mar uu ka hadlayay khasaaraha dhanka ciidamada ayaa waxa uu yiri “Annaga waxa na soo gaaray ma badna, wixii xagayna gaara waa shuhaddo, dalkooda iyo diintooda difaacaya. Runtii dagaal haddii la galana dhimashana waa jirtaa, dhaawacna waa jiraa, laakiin khasaaraha ciidamadeenna soo gaaray aad buu u kooban yahay.”
Korneyl Dayax ayaa hawlgalka koonfurta Gobolka Mudug ku sheegay mid dadka deegaanka looga dulqaadayo dhibaatada ay ku hayaan kooxaha argagixisada.
