Dagaalo culus ayaa saaka mar kale waxay ka dhaceen degaanka Qaayib ee gobolka Galgaduud, halkaasoo ay mudooyinkan gacanta ku hayeen ciidamada xoogga dalka iyo kuwa degaanka.

Sida wararku sheegayaan dagaalka saaka ka qarxay degaanka Qaayib ayaa bilowday markii xoogag taabacsan Al-shabaab ay halkaas ku qaadeen weerar culus oo ku bilowday gaadiid qaraxyo laga soo buuxiyey.

Waxaa la soo sheegayaa in dagaalka saaka uu geystay khasaare balaaran oo dhimasho iyo dhaawacba leh, waxaana xaalada degaankaas ay tahay mid cakiran, iyadoo isgaarsiintu ay tahay mid ciriiri ah.

Dowladda Soomaaliya oo war ka soo saartay weerarkan ayaa sheegtay in Al shabaab si wayn loogu jabiyay dagaalka saaka ka dhacay degaanka Qaayib.

Wasiir ku xigeenka Warfaafinta C/raxman Yuusuf Al-Cadaala ayaa sheegtay in la fashiliyay saddex Qarax oo Alshabaab ay doonayeen inay ku gaystaan waxyeelo, isagoo xusay inay Qaayib si buuxda gacanta ugu hayaan Ciidamada huwanta ah.

Al-shabaab ayaa warar ay ku baahiyeen baraha bulshada waxay ku sheegteen iney qabsadeen degaanka Qaayib ayna laayeen inta badan ciidamadii halkaad ku sugnaa, iyagoo xusay iney qaateen gaadiid dagaal iyo saanad milateri oo ay dagaalka kaga furteen ciidamada huwanta.

Ma jiraan warar madax banaan oo ka waramaya sida ay wax dhaceen, hase ahaatee waa markii afraad ee Al-shabaab ay weerar noocan ah ku qaadaan degaanka Qaayib oo ka mid ah degaanada hoos taga degmada Baxdo ee gobolka Galgaduud.