Xoghayaha guud ee Xisbiga Center-ka, Hannes Hervieu, ayaa farriin qoraal ah ku sheegay in xisbigu marka hore sugayo natiijada kama dambaysta ah ee doorashada, balse uu diyaar u yahay inuu Social Democrats kala hadlo sidii loo dhisi lahaa dowlad cusub.
“Hadda waxaan sugaynaa natiijada kama dambaysta ah, laakiin waxaan diyaar u nahay, annaga iyo Social Democrats, inaan eegno sida Sweden ku heli karto dowlad si wax-ku-ool ah u shaqayn karta.”
Shuruudaha Xisbiga Center-ka#
Hervieu wuxuu sheegay in haddii natiijada doorashadu sida hadda tahay ku sii ekaato, Social Democrats ay tahay inay si guud u eegaan natiijada doorashada.
Sida uu sheegay, fasiraadda Xisbiga Center-ka waxay tahay in cod-bixiyayaashu:
- aysan doonayn in dhaqaalaha Sweden si weyn loogu leexiyo dhanka bidix;
- aysan doonayn in Sweden Democrats ay yeeshaan saameyn siyaasadeed oo aad u weyn;
- aysan dalbanayn siyaasadaha xisbiyada xagjirka ah;
- balse ay doonayaan xasillooni siyaasadeed iyo siyaasad leh jihayn dhexdhexaad ah.
Hervieu wuxuu sheegay in qodobadan ay noqon doonaan meesha uu Xisbiga Center-ka ka bilaabayo wada-hadallada Social Democrats ee ku saabsan dhismaha dowlad cusub.
Mowqifkan cusub ayaa yimid kadib markii Xisbiga Center-ka uu saacado badan Isniintii ka gaabsaday inuu ka jawaabo su’aalaha saxafiyiinta ee ku saabsanaa cidda ay taageeri doonaan iyo doorka ay ku yeelan karaan go’aaminta cidda awoodda dalka Sweden la wareegaysa.
