Weli way socotaa tirinta codadka doorashada Kenya, gaar ahaan tan madaxweynimada. Hase yeeshee, waxaa si horudhac ah loo shaaciyay qaar ka tirsan kuraasta la doortay oo ay ugu badan yihiin xildhibaannada.
Qoraalkan waxaan ku eegaynaa siyaasiinta Soomaalida ah ee ugu miisaanka culus ee ilaa iyo hadda ku soo baxay doorashada Kenya, kuwaas oo noqday xildhibaanno, waxaana ka mid ah.
Xildhibaan Aadan Barre Ducaale
Aadan Barre Ducaale ayaa kursigiisii xajistay. Waxaa laga soo doortaa magaalada Gaarisa ee gobolka Waqooyi-bari Kenya .Waxaa kursiga doorkan kula tartamayay ilaa saddex murashax oo kale oo uu uga adkaaday.
Wuxuu kursigaan hayay ilaa sanadkii 2007. Aadan ayaa sidoo soo noqday hoggaamiyaha aqlabiyadda baarlamaanka Kenya. Waa Soomaaligii ugu horreeyay ee xilkaas qabta. Waxaa lagu tilmaamaa inuu yahay nin aad siyaasadda Kenya uga dhex muuqda oo aan la gabban fikirkiisa.
Hadda waxay isku dhinac yihiin madaxweyne ku-xigeenka Kenya, William Ruto oo ah ninka raysul wasaarihii hore Raila Odinga kula tartamaya xilka madaxweynimada.
Farax Macallin Dawaare
Faarax Macallin ayaa muddo toban sano ah kaddib loo doortay xildhibaanka degmada Dhadhaab ee gobolka Waqooyi-bari Kenya. Waa halka ay ku nool yihiin qaxootiga ugu badan ee Soomaalida ah.
Waxaa kursigaan kula tartamayay labo nin oo ugu dambeyn uu ka guulaystay. Wuxuu helay codad ka badan 12 kun.
Inkasta oo uu toban sano ka maqnaa xilalka dowladda, haddana jagadaan waxay noqonaysaa markii saddexaad ee loo doorto xildhibaannimo.
Wuxuu guddoomiye ku-xigeen ka soo noqday baarlmaanka Kenya. Wuxuu ahaa ninkii ugu horreeyay ee xilkaas qabta, isaga oo waliba xilligaas ka socday dhanka mucaaradka dowladdii madaxweynihii hore ee Mwai Kibaki .
Kursiga uu hadda ku guulaystay Faarax Macallin, waxaa horay u hayay Daahiye Maxamed Ducaale.
Faarax waa siyaasi aad uga hadla arrimaha Soomaaliya.
Xildhibaan Yuusuf Xasan Cabdi
Xildhibaanka degmada Kamakunji oo ay xaafadda islii ka mid tahay markii afaraad ayuu ku guulaystay kursiga.
Yuusuf Xasan wuxuu xubin ka yahay xisbiga Jubilee ee madaxweynaha xilka dhameysanaya ee Uhuru Kenyatta.
Sanadkii 2012 ayuu Yuusuf Xasan ku dhawaacmay qarax ka dhacay xaafadda Islii ee magaalada Nairobi. Xilligaas olole ayuu ku jiray, isagoo ka soo kabanaya dhaawacaas ayaa mar kale horay loogu doortay xilka.
Xildhibaan Yuusuf Xasan Cabdi waa weriye hore oo ka soo shaqeeyay warbaahin kala duwan oo ay ku jiraan laamo kala duwan oo BBC-da ah sida laanta-af Soomaaliga, Sawaaxiliga iyo BBC-Afrika. Sidoo kale wuxuu la soo shaqeeyay Qaramada Midoobey.
Junet Maxamed
Markii saddexaad ayuu ku guulaystay kursiga xildhibaannimo ee bariga deegaanka Sunna ee deegaanka Migori.
Waa Soomaali balse deegaan-doorashadiisa Soomaalidu kuma badna. Halkaas waxaa sidoo kale ka soo jeedo ninka uu aadka u taageero ee Raila Odinga oo hadda u taagan jagada ugu sarreysa ee madaxtinimada Kenya.
Waxaa la aaminsan yahay inuu ka mid yahay dadka laf-dhabarka u ahaa ololaha doorashada ee Raila.
Maxamed Caddow
Waa nin ku cusub siyaasadda, horeyna u ahaa wariye caan ah oo la soo shaqeeyay telefishinka Al-Jazeera ee laga leeyahay dalka Qadar qaybtiisa af-Ingiriiska.
Sidoo kale wuxuu horay uga soo shaqeeyay warbaahin kala duwan oo BBC-du ay ka mid tahay.
