Kooxda Al-Shabaab ayaa shaacisay in lasoo gaba-gabeeyay shirweynihii labaad ee wada-tashiga wax ay kooxdu ugu yeertay Jihaadka ka socda Bariga Afrika, kaasi oo ka qabsoomay gobolka Jubbada Dhexe, inkasta oo aan la shaacin goobta uu sida gaar ah uga dhacay.
Sawirro ay kooxda baahisay ayaa muujinaya Abu Cubeyda oo dhex fadhiya shirka balse kooxda ayaa qarisay wejigiisa oo sawiradiisa ku furtay humaag.
Kooxda ayaa sheegtay in shirkan uu socday muddo siddeed maalmood ah, ayada oo warbaahinta Al-Shabaab ay baahisay war-murtiyeed iyo fatwo kasoo baxay shirkan, oo ay u dhan yihiin dhamaan dhinacyada kasoo qeyb-galay.
Kulankan ayaa waxaa lagu gorfeeyay marxaladda uu marayo wax ay kooxdu ugu yeerto “Jihaadka Bariga Afrika iyo shirqoolada kala duwan ee uu cadowgu usoo maleegayo si loo xagal daaciyo halganka Jihaadka,” sida lagu sheegay bayaanka kasoo baxay shirkaan.
Waxaa xusid mudan in qofka kaliya ee wejigiisa la qariyay uu ahaa Amiirka kooxda Al-Shabaab, oo muddooyinkii dambe warar la faafiyay ay sheegayeen inuu xanuunsanayo.
Amiirka Al-Shabaab, Axmed Cumar Abuu Cubeyda oo ah nin aan wax badan laga aqoon, marka laga reebo beesha uu kasoo jeedo, ayaa sidoo kale la hayn muuqaallo rasmi ah oo lagu aqoonsan karo.
Si kastaba, Arrintaan ayaa waxaa durba ka dhashay hadal hayn xooggan, ayada oo dadka qaar ay ku macneeyeen inay tahay dib u dhac sirdoon, maadaama ay hay’adda Sirdoonka Soomaaliya ay ogaan weyday dhicitaanka shirka intaas la’eg ee kooxda Al-Shabaab ay ku qabsatay gudaha Soomaaliya, xilli ay muddooyinkii dambe soo warineysay waxa ka socda gudaha kooxda.
