Tirakoob cusub oo ay soo saartay Hay’adda Socdaalka Iswiidhan ayaa muujiyay in tirada dadka la siiyay jinsiyadda Iswiidhan ay si weyn hoos ugu dhacday bishii Juun, kadib markii la dhaqan geliyay xeerar cusub oo adkeynaya shuruudaha jinsiyadda.

Hay’addu waxay bishii Juun jinsiyadda siisay 1,646 qof, halka bishii May la siiyay 3,970 qof, taasoo ka dhigan hoos u dhac gaaraya ku dhowaad 58%.

Dhanka kale, Hay’adda Socdaalka ayaa diidday 3,259 codsi oo jinsiyad doon ah bishii Juun. Taasi waxay sare u qaaday heerka diidmada ilaa 66%, marka loo eego celcelis ahaan 35% ee la diiday intii lagu jiray sannadka 2026.

Inkasta oo tirada la siiyay jinsiyadda ay ka yar tahay bishii May, haddana waxay wax yar ka badan tahay bishii Juun ee sannadkii 2025, markaas oo jinsiyadda la siiyay 1,501 qof. Xilligaas waxaa la hirgeliyay shuruud cusub oo ahayd in codsaduhu si shaqsi ah u xaadiro, taasoo hoos u dhigtay tirada go’aannada la gaaray.

Hoos u dhaca ugu weyn waxaa laga diiwaangeliyay dadka kasoo jeeda Suuriya, Afgaanistaan, Eritrea, Poland iyo Hindiya, kuwaas oo si wadajir ah u ah in ka badan saddex-meelood meel dadka jinsiyadda Iswiidhan qaatay sannadka 2026.

Dadka reer Suuriya ee jinsiyadda helay waxay hoos uga dhaceen 539 qof bishii May ilaa 114 qof bishii Juun.

Dadka reer Afgaanistaan waxay ka soo dageen 243 ilaa 66 qof.

Dadka reer Eritrea waxay ka yaraadeen 233 ilaa 75 qof.

Dadka reer Poland waxay hoos uga dhaceen 171 ilaa 96 qof.

Dadka reer Hindiya waxay ka soo dageen 219 ilaa 75 qof.

Tirakoobkan ayaa muujinaya saameynta degdegga ah ee ay yeesheen xeerarka cusub ee lagu adkeeyay helitaanka jinsiyadda Iswiidhan.