Maamulka Puntland ayaa si adag uga horyimid qorshaha dowladda madaxweyne Xasan Sheekh ee wax ka beddelka iyo dhameystirka dastuurka, xilli baarlamaanka uu shalay bilaabay ka doodista arrinkaasi.
Wasaaradda Caddaaladda Puntland Maxamed Cabdiwahaab oo la hadlay warbaahinta gudaha ayaa sheegay in maamulka uu doonayo in waddo sax ah oo sharci ah loo maro wax ka beddelka dastuurka.
Sidoo kale waxa uu sheegay in qorshaha dowladda uusan noqon karin meel mar, maadaama uu ku dooday in laga leexday hanaankii saxda ah, “madaxweynaha iyo dowladdiisa waxay waxay Xamar ka wadaan waxay ummadda u keenaysaa dib u dhac.”
Ugu dambeyntiina wuxuu sheegay in Puntland aysan aqoonsan doonin kuna dhaqmi doonin wax ka beddelka dastuurka, haddii ay dowladda madaxweyne Xasan Sheekh si sharci darro ah wax uga beddesho dastuurka.
Xildhibaannada labada Aqal ee baarlamaanka ayaa shalay bilaabay ka doodista wax ka bedelka dastuurka oo la qorsheynayo in laba todobaad ay socoto oo ugu dambeyna la ansixiyo, waxaana is weydiinta tahay haddii si isku duuduub ah loo meel-mariyo sida loo hirgeli doono, iyada oo ay diidan yihiin madaxdii hore ee dalka, maamulka Puntland iyo siyaasiyiinta mucaaradka.
