Wararka naga soo gaaraya gobolka Bari ayaa sheegaya in saaka howlgal kale oo wayn ay qaadeen ciidamada ammaanka Puntland, kaas oo lagu beegsaday fariisimo ay Daacish ku sugneyd, kuna yaalla aagga buuraha Calmiskaad.

Howlgalka oo ahaa mid qorsheysan ayaa si gaar ah uga dhaca deegaanka Haraaryo oo u dhow halka loo yaqaano Toga-Jaceel, waxaana culus jab lagu gaarsiiyay kooxda Daacish.

Qoraal kooban oo kasoo baxay Taliska Howlgalka Ciribtirka Argagixisada ee Puntland ayaa waxaa lagu sheegay in maleeshiyaadka kooxda dhegta dhiigga loo daray, isla-markaana dhimasho iyo dhaawac lagu gaarsiiyay howlgalka ay saaka qaadeen ciidamada ammaanka.

“Ciidanku waxay markale dhegta dhiiga u dareen, Argagixisada Daacish- deegaanka Haraaryo, Toga-Jaceel ee buuralayda Calmiskaad” ayaa lagu yiri qoraal taliska.

Sidoo kale waxa lasii raaciyay in maydad badan ay ka carareen xubnaha Daacish ee ku sugnaa deegaanka Haraaryo oo ah halka lagu beegsaday maleeshiyaadka.

“Saaka maydkooda Argagixisada Daacish, ayaa meel walbo yaallo – Haraaryo , Tog jeceel, buuraha Calmiskaad” ayaa mar kale lagu yiri warsaxaafadeedka.

Xaaladda ayaa weli kacsan, waxaana dhaq-dhaqaaqyo ciidan oo culus laga dareemayaa aaga buuraha Calmiskaad oo ah halka ay isku hayaan Puntland iyo kooxda Daacish.

Howlgalkan waxaa ka horreeyay weerar kale oo dhanka cirka ah oo Isniintii lagu beegsaday Daacish, loogana dilau illaa 13 dagaalyahan oo ajnabi ahaa, sida ay shaacisay Puntland.

Duqeyntan ayaa lagu garaacay saldhigyo ay kooxda argagixisada ku dhuumaaleysaneysay, waxaana ay qeyb ka ahayd howlgalka socda ee ka dhanka ah argagixisada oo la fuliyay 24-kii saac ee la soo dhaafay, sida ay sheegeen saraakiisha amniga ee gobolka.