Ra’iisul Wasaaraha Xukuumadda Federaalka Mudane Hamza Abdi Barre oo maanta gaaray saldhigga ciidamada Ballidoogle, waxa uuna halkaasi ugu soo xiray tababar ciidamo ka tirsan Kumaandooska Danab ee xoogga dalka.

Ciidamadan oo qaatay tababar sare oo ku aaddan difaaca dalka iyo ciribtirka kooxda Al Shabaab, ayaa Ra’iisul Wasaaruhu ku boggaadiyay dadaalka ay muujiyeen mudadii ay ku jireen tababarka.

Mudane Xamse ayaa uga mahadceliyay dowladda Mareykanka oo kaalin weyn ka qaadatay tababarka ciidankan iyo maalingalintooda, waxa uuna sheegay in ciidankan door muhiim ah uga jiraan dagaalka ka dhanka ah Al Shabaab.

Ciidanka kumaandooska Soomaaliya gaar ahaan kuwa Danab waxaa tababar siiya sidoo kale maalgalisa dowladda Mareykanka, waxa ayna ciidankan wada shaqeyn dhaw la leeyihiin ciidamada Mareykanka ee jooga Soomaaliya.