Waxaaa saaka magaalada Hargeysa ku gooriyooday alaha u raxmadee abwaan Siciid Maxamuud Gahayr oo ka tirsanaa bahda hal abuurka Somaliland.
Sida uu noo sheegay xildhibaan Xassan Dhuxul Laabsaalax oo ay saaxiib ahaayeen ayaa BBC u sheegay in Gahayr uu qabay xanuunka sokorta oo uu muddo la dhibanaa sidoo kalana uu la qandhanaa dhawanahaan xumad ka jirta Hargeysa oo ay dad badan ka cabanayaan.
Sanadkii 1986-dii ayuu abwaan Siciid Gahayr ku dhashay magaalada Hargeysa. Dugsiga hoose dhaxe wuxuu ka baxay iskoolka Riis, dugsiga sarana wuxuu dhigtay iskuulka Maxamuud Cali, halka jaamacad Hargeysa uu ka qaatay shahaadada kowaad.
Alaha u raxmadee Gahayr wuxuu ahaa macalin, qoraa iyo hal abuure suugaaneed oo si weyn looga yaqaana dhulka Soomaalida.
Wuxuu lahaa ilaa toddobo buug oo qaybtood uu gacanta ku hayey inta uusan geeriyoon iyo kuwa soo baxay oo la daabacay.
”Wuxuu ahaa maktabad guuraysa, nin dadka caawiya oo dabeecadiisu cidna shaashayn oo qofkasta jeclaa. Wuxuu ahaa saaxiibkey mudo dheer, wuxu ahaa nin danta guud ee bulshada ka hormariya tiisa gaara.” ayuu yiri Abwaan Laabsaalax oo BBC la hadlayay.
Marxuunka ayaa ifka ugu tagay laba xaas iyo wiil lagu magacaabo Cadnaan Siciid Maxamuud Gahayr sida uu xusay abwaan Laabsaalax oo taariikhdisa nooga waramay.
‘’Wuxuu ahaa oo an qiryaa inuu ahaa shaqsi balanta ku fiicnaa, dadka nugul caawiya oo waliba aan ka harin caawintooda”
Waxbarashada Somaliland ayuu ku lahaa door muuqda, wuxuuna inta badan dugsiyada sare ee Hargeysa ka ahaa macalin maadada Bayloojiga ka dhiga.
Dugsiyda sare ee uu baraha ka ahaa waxay kala yihiin Gacan libaax, Quule, Maxamuud Axmed, Nuuradiin iyo kuwa kale oo badan
Sugaantii Abwaan Gahayr.
Abwaan Siciid Maxamuud Gahayr ayaa ka soo jeeda qoys suugaaneed. Aabihiisa ayaa gabyaa ahaa halka hooyadiisnatirin jirtay buraanburka.
Laakiin isagu wuxuu badaha maansada yabyabkeeda bilaabay intii uu ku jiray waxbarashada sare, sanadkii 2007-dii xiligaas oo curunteeda uu bilaabay.
“Waxaan dhagaystay maanso la yiraahdo ‘Hagar Laawe’ oo uu tiriryey Allaha u naxariistee Abwaan Gaariye, anigoo jooga Pakistan xiligaas ayaan raadraac ku bilaabay suugaanta iyo hal abuurka,”ayuu ku sheegay waraysi uu hore u bixiyey Abwaan Gahayr.
Wuxuu lahaa suugaan kala duwan oo gabayo u badnaa sida ‘Dugaal, Dunta Nabada iyo Hiigsi nabadeed ee colaad laga hadlayey’ oo ay ku wada jiraan abwaano kale duwan.
Maansada ugu caansan ee u tiriyey ayaa lagu magacaabaa ‘Samaan Hooyo’ oo ah maanso xambaarsan hilow uu u qaaday hooyadii xilli uu waxbarasho u aaday dalka Pakistan.
Buugaagtii uu qoray
Allaha u raxmadee abwaan Siciid Gahayr wuxuu ahaa qoraa sameeyey buugaag kala duwan oo dhaqanka, nolosha iyo jacayl ku saabsan iyo kuwo kale oo uu ka qoray dad taariikh ku lahaa Somaliland.
Sida uu horey u sheegay sanadkii 2005-tii ayuu bilaabay qoraalka isagoo Idaacada Radio Hargaysa gayn jiray maqaalo.
Buugaagta uu qoray waxaa ka mid ahaa buug uu ku tilmaami jiray inuu ahaa curadka buugaagtiisa kaas oo uu ka qoray taariikhda allaha u raxmadee Xaaji Cabdi Waraabe oo lagu kala magacaabi jiray ‘Astaantii Nabada iyo Sama-Talis’.
Kuwa kale oo uu qoray waxaa ka mid ahaa kuwa inta badan taabanayey nolosha dadka iyo kuwa uu ku baaqayey in qabyaaladi aysan meelna looga hormari karin.
Bil ka hor mar uu BBC-du la hadlay ayuu abwaanku ka tacsiyeey geerida laba ninoo dhallinyaro ah oo ku geeriyooday shil gaari oo ka dhacay meel u dhaw magaalada Sheekh ee Somaliland, isaga oo ka sheekeeyey taariikhda allah u raxmadee labada nin oo ahaa film qaadayaal ka tirsanaa shabakadda Waqal studio.
Abwaanka waxaa maanta lagu aasayaa magaalada Hargeysa halkaas oo saaka uu ku geeriyooday
