is rasaaseyn ka dhacday Magaalada Garoowe oo Khasaaro Ka dhalatay

Inta la xaqiijiyay hal askari ayaa geeriyooday laba kalena waa ay dhaawacmeen kadib is rasaaseyn Magaalada Garoowe ku dhexmartay ilaalada madaxweyne ku-xigeenka Puntland Axmed Cilmi Cismaan Karaash iyo Ciidamada Taraafikada.

Is rasaaseynta ayaa la sheegey in ka dhalatay baabuur ay Ciidamada taraafikada ka xareeyeen Ciidanka madaxweyne ku-xigeenka, iyada oo labada Ciidan ay degan yihiin Goobo isku dhow.

Ciidamo kale oo ka tirsan kuwa Maamulka Puntland ayaa kala dhexgalay Ciidamada dagaalamay, iyada oo dadka magaalada Garoowe uu saameeyay dagaalka dhexmaray labada Ciidan.

Wararka warbaahinta ay heleyso ayaa waxaa ay sheegayaan in Afar askari loo xiray dagaalka dhexmaray Ciidamada Taraafikada iyo kuwa ilaalada Madaxweyne kuxigeenka Puntland si baaritaan loogu sameeyo.