Howlgal lagu dilay horjoogihii kooxda Al-Shabaab u qaabilsanaa howlgelinta maleeshiyaadka ka dagaalama gobolka Bakool, kaas oo magaciisa lagu sheegay Isaaq Cabdullaahi Afey iyo dhammaan ilaaladiisii ayaa maanta ka dhacay deegaan hoos taga degmada Waajid ee gobolka Bakool.
Sida ay ogaaray Mudug24 ninka la beegsaday oo wata kolonyo gaadiid ah ayaa ka yimid dhinaca magaalada Tiyeeglow, markii laga soo tago ilaaladiisa, waxaa la socday xubno qoyskiisa ah oo lala duqeeyey.
Dadka yaqaana waxay noo sheegeen inuu Shabaab dhexooda ka ahaa xubin firfircoon, lug ayaa kaga go’day dagaaladii uu u galay kooxda oo hal lug ayuu lahaa waayihii dambe.
Madaxda ugu sareysa kooxda Al-Shabaab ayaa hadda ka quusatay inay isaga safraan deegaanada ay ka joogaan koonfurta iyo bartamaha Soomaaliya, maadaama si joogto ay u ugaarsanayaan diyaaradaha dagaalka.
Inkastoo dagaalka xoogiisa uu ka socdo Galmudug iyo HirShabeelle, hadana waxaa si joogto ah kooxda loogu baacsadaa deegaanada Koonfur Galbeed iyo Jubbaland, maalin kasta ciidamada qaranka ayaa soo bandhiga meydadka dagaalyahano laga laayey kooxda Al-Shabaab.
