Guddoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale) ayaa maanta xilka ka qaaday saddex kamid ah guddoomiyaasha degmooyinka gobolka Banaadir, waxa uuna magacaabay guddoomiyaal cusub.

Wareegtada uu soo saaray guddoomiyaha gobolka Banaadir ayaana xilka looga qaaday guddoomiyaashii degmnooyinka Boondheere, Hodan iyo Waabari, waxaana isla wareegtda lagu magacaabay guddoomiyaal cusub oo degmooyinkaasi maamulaya.

Guddoomiyaha cusub ee degmada Boondheere ayaa loo magacaabay Maxamed Cabdullaahi Cumar (Deeyoo), guddoomiyaha degmada Waabari ayaa loo magacaabay Maxamed Sayid Cali, halka guddoomiyaha degmada Hodan loo magacaabay Cali Axmed Faarax.

Duqa Muqdisho guddoomiyaasha uu magacaabay waxaa ku jira Maxamed Deeyoo oo kamid ah shaqsiyaadka caanka ka ah baraha bulshada, waxa uuna ninkan ku caan baxay mucaaradnimada dowladdii Farmaajo iyo taageerada Xasan Sheekh Maxamuud.

Dowladda cusub ee Madaxweyne Xasan Sheekh ayaa qaadeysa wadadii dowladii hore ee Madaxweyne Farmaajo oo xilal ku abaal marisay dadkii taageeray Farmaajo, waxaana hadda xilal badan lagu abaalmariyay dadkii sida weyn u taageersanaa Xasan Sheekh.