Ku dhawaad 500 oo tahriibayaal ah oo ku go’doonsanaa xeebaha dalka Talyaaniga oo ay saarnaayeen maraakiib samatabixin ah ayaa loo ogolaaday inay ka soo degaan. Markab kale ayaa loo diray Faransiiska, balse xaaladda ayaa xiisad ka dhex dhalisay dalalkaasi.
Boqolaal muhaajiriin ah oo ku xayiran xeebaha Talyaaniga ayaa loo ogolaaday inay galaan Yurub Talaadadii, ka dib markii dhowr markab loo ogolaaday inay rakaabkooda ka dejiyaan Sicily.
Markab kale ayaa u sii socdaalay Faransiiska, ka dib markii uu xiisad diblomaasiyadeed ka dhex abuuray Paris iyo Rome.
Muhaajiriintan ayaa waxaa soo badbaadiyay maraakiib samafal oo marayay badda Mediterranean-ka, xilli ay marayeen marin halis ah oo ay ka soo tallaabeen waqooyiga Afrika, kuna sii jeeday dalka Talyaaniga.
Dowladda Talyaaniga oo uu hogaamiyo garabka midig ayaa dhowr maalmood sugayey doonyaha, taasi oo u ogolaatay dadka dhibaateysan oo kaliya inay soo degaan.
89-ka tahriibayaasha ah ee la socday hay’adda samatabixinta badda ee Jarmalka ee Mission Lifeline markabka, Rise Above, ayaa ugu dambeyntii loo oggolaaday inay dhulka yimaadaan Talaadadii.
35-ta qof ee tahriibayaasha ah ee la socday markabka SOS Humanity ee laga leeyahay dalka Jarmalka, kuwaas oo intooda badan bilaabay cunto ka soomid ka dib markii ay dawladda Talyaanigu markii hore diiday, ayaa sidoo kale loo oggolaaday inay dejiyaan. Ururku waxa uu qorsheynayay in tilaabo sharci ah laga qaado masuuliyiinta Talyaaniga.
Saacado ka dib, in ka badan 200 oo muhaajiriin ah ayaa loo ogolaaday inay ka soo degaan markabka badbaadinta ee Geo Barents.
Maamulka Talyaanigu waxay baareen dadkii la socday markabka waxayna go’aansadeen inay u ogolaadaan inay xeebta ku yimaadaan sababo bani’aadanimo, ayuu yidhi Riccardo Gatti oo ka tirsan ururka dhakhaatiirta aan xuduuda lahayn (MSF).
