Dad badan oo muhaajiriin ah oo kunool gobollo katirsan dalka Mareykanka, ayaa haatan waxaa soo wajahay walaac kale oo hor leh, kaddib markii dowladda Madaxweyne Trump soo saartay amar cusub oo dalkaasi looga saarayo dad badan oo soo galay xilligii dowladdii Madaxweyne Biden.
Kumannaan qof oo muhaajiriin ah oo dalka Mareykanka tegay xilligii maamulka Biden isla markaana ku baxay barnaamaij gaar ah oo jadwal loogu sameeyay ballamaha dadka magangalyo-doonka ah ayaa lagu amray inay dalkaasi degdeg uga baxaan.
Warbaahinta dalka Mareykanka ayaa ku warrameysa in ku dhowaad 900,000 oo muhaajiriin ah oo dhanka koofureed kasoo galay Mareykanka kuna tegya barnaamijka, CBP One, in ay isaga baxaan Mareykanka, haddii kale ay mari doonaan haddii la qabto ciqaab adag.
Muhaajiriintan hadda la amray in ay ka baxana dalka Mareykanka , ayaa horrey loo siiyay ogolaansho in muddo labo sano ah si sharci ah uga shaqeestaan gudaha Mareykanka, hasa ahaatee maamulka Madaxweyne Trump, ayaa kala laabtay dadkaasi fursadahaasi horey loo siiyay.
Madaxweynaha dalka Mareykanka, ayaa horrey u ballanqaaday in Mareykanka ka saari doono muhaajiriinta sida sharcidarada ah kusoo galay dalkaasi, waxa uuna markii uu talada dalkaasi la wareegay durba bilaabay in uu tarxiilo qaar kamid ah muhaajiriinta Mareykanka sharcidarada kusoo galay.
