Ciidankii iyo hubkii ugu horreeyay ee Beelweynta Murusade ayaa lagu wadaa in ay maanta ka dagaan midkood magaalooyinka Beledweyn iyo Guriceel ee gobollada Hiiraan iyo Galguduud, si ay uga sii gudbaan Maxaas, halkaas oo ay kaga sii ruqaansan doonaan Wabxo.
Beesha Murusade oo shalay ciidan iyo gawaari dagaal oo aad u fara badan kusoo bandhigtay duleydka degmada Deyniile ayaa sidoo kale berri dhammeystiri doonto daad-gureynta ciidamadooda, waxeyna xildhibaannadooda iyo saraakiishooda shalay caddeyeen go’aankooda ku aaddan gulufka lagu xoreynayo deegaannada ay beeshu ka dagto Galmudug.
Tani ayaa ka dhigan in reer Hiiraan ay helayaan gurmadkii ugu badnaa, culeyskana uu ka dagi doono, maadama beelweynta Abgaal ay iyagana dhaqdhaqaaq xooggan ka wado gobolka Sh/Dhexe.
