Home Wararka Caalamka Hay’adda Socdaalka Sweden oo soo bandhigtay Tirada Dadka loo ogolaaday gunnada dib-u-noqoshada...

Hay’adda Socdaalka Sweden oo soo bandhigtay Tirada Dadka loo ogolaaday gunnada dib-u-noqoshada tan iyo bilowgii 2026

0

Hay’adda Socdaalka Sweden (Migrationsverket) ayaa soo saartay tirakoob cusub oo ku saabsan codsiyada iyo go’aannada la xiriira gunnada dib-u-noqoshada ikhtiyaariga ah (Återvandringsbidrag).

Sida ku cad xogta hay’adda, tan iyo bilowgii sannadka 2026 waxaa la go’aamiyey 677 kiis. Waxaa la oggolaaday 224 codsi, halka 366 codsi la diiday. Sidoo kale, 87 kiis ayaa lagu soo afjaray go’aanno kale, sida in codsiga la laalo ama aan la aqbalin.

Bisha Abriil ayaa noqotay bishii ugu badnayd dhinaca oggolaanshaha, iyadoo 69 codsi la ansixiyey, 125 kiisna go’aan laga gaaray.

Bisha Maajo ayaa kaalinta labaad gashay, iyadoo la oggolaaday 46 codsi, waxaana ku xigtay Juun oo la ansixiyey 43 codsi. Bishii Agoosto waxaa la oggolaaday 27 codsi, halka Oktoobar la ansixiyey 18 codsi.

Dhanka kale, Sebtembar waxaa la diiwaangeliyey 8 oggolaansho, Luulyo 7, halka Febraayo iyo Maarso midkiiba la oggolaaday 3 codsi. Bishii Janaayo wax codsi ah lama oggolaan.

145 rag ah iyo 79 haween ah ayaa la siiyey oggolaanshaha#

Tirakoobka cusub ee la daabacay 16-ka Nofeembar ayaa muujinaya in 145 rag ah iyo 79 haween ah ay heleen oggolaanshaha gunnada dib-u-noqoshada tan iyo bilowgii sannadka.

Dhanka codsiyada la diiday, 236 waxay ahaayeen rag, halka 130 ay ahaayeen haween.

149 codsi ayaa loo gudbiyey carruurta ka yar 18 sano#

Xogta hay’adda ayaa sidoo kale muujinaysa in 149 codsi tan iyo bilowgii sannadka loo gudbiyey dad ka yar 18 sano.

Codsiyada carruurta ayaa loo kala qaybiyey sidan:

  • 58 codsi oo loogu talagalay carruurta ka yar 7 sano.
  • 59 codsi oo loogu talagalay carruurta da’doodu u dhaxayso 7 ilaa 12 sano.
  • 32 codsi oo loogu talagalay dhallinyarada da’doodu u dhaxayso 13 ilaa 17 sano.

Dhanka kiisaska go’aanka laga gaaray ee carruurta ka yar 18 sano, tiradoodu waxay ahayd 129 kiis. Kuwaas waxaa ka mid ahaa:

  • 48 kiis oo carruurta ka yar 7 sano ah.
  • 52 kiis oo carruurta da’doodu u dhaxayso 7 ilaa 12 sano ah.
  • 29 kiis oo dhallinyarada da’doodu u dhaxayso 13 ilaa 17 sano ah.

Tirakoobkan ayaa muujinaya xaaladda codsiyada gunnada dib-u-noqoshada ee Sweden, iyadoo boqolaal codsi weli ay sugayaan in go’aan laga gaaro.

Ad