Madaxweynaha maamulka Jubbaland Axmed Maxamed Islaam Axmed Madoobe ayaa Kenya ku ammaanay inay saldhig u tahay dowladnimada Soomaaliya ee maanta jirta, isagoo sheegay in Kenya ay abaal badan ku leedahay Soomaalida.

Madaxweyne Axmed Madoobe ayaa sheegay in Kenya laga doonayo inay mar walba garab istaagnaato Soomaaliya, oo uu sheegay in ay weli ku jirto gacmo qoyan.

“Innagu Kenya deris baan nahay, dadka waan isaga dhow nahay. Madaxweyne Ruto sidii xilka loogu dhiibay Kenya wax badan buu ka beddelay. Waxaan rajeynayaa Soomaalidayada maanta dhisan ee dowladda ah, Kenya ayaa asal u ah oo Mbagathi baa lagu dhisay,” ayuu yiri madaxweyne Axmed Madoobe.

Hadalkaan ayuu Axmed Madoobe ka sheegay xaflad aroos oo ka dhacday magaalada Gaarisa, halkaas oo uu goob joog ka ahaa madaxweynaha dalka Kenya Willian Ruto iyo masuuliyiin ka kala socday Dowladdaha Kenya, Itoobiya iyo Soomaaliya.

Madaxweynaha Jubaland, iyo Dowladda Kenya waxay leeyihiin xiriir weyn. Kenya waxay dhowr jeer u fududeysay madaxweyne Axmed Madoobe safarro iyo kulamo rasmi ah, iyadoo sidoo kale dhex-dhexaadin ka samaysay khilaafaadka u dhexeeya Jubaland iyo dowladda dhexe ee Soomaaliya.

Kenya ayaa dhankeeda u aragta maamulka Jubbaland ee deriska la ah dalkeeda inuu muhiimad weyn u leeyahay  amniga dalkeeda, iyo sidoo kale  doorka Kenya ee xasilinta gobolka, gaar ahaan dagaalka ka dhanka ah Alshabaab.

Hadalka Axmed Madoobe wuxuu kusoo aaday, iyadoo dhawaan Soomaaliya iyo Jabuuti ay u dabaal dageen sanad guuradii 25-aad ee kasoo wareegtay shirkii nabadaynta iyo dhismaha ee lagu qabtay magaalada Carta, ee lagu yagleelay jamhuuriyaddii saddexaad ee Soomaaliya, kaddib burburkii dalka.

Inkastoo shirkaas ay ka qeyb galeen madaxweynaha Soomaaliya iyo madax kale, haddana madaxweynaha Jubbaland kama mid ahayn dadka ka qeyb galay shirkaas.