Safaaradda Jamhuuriyadda Federaalka Soomaaliya ee Mareykanka waxay idin soo gudbinaysaa lixda qodob ee ugu waaweynaa qudbadda Ra’iisul Wasaare Mudane Xamza Cabdi Barre, ka jeediyay Kalfadhiga 79-aad ee Golaha Guud ee Qaramada Midoobay. Qudbaddiisa waxaa ugu muhiimsanaa:
1. Midnimada caalamka ee ka dhanka ah colaadaha iyo xaaladaha bini’aadantinimo:
Ra’iisul Wasaaraha ayaa hoosta ka xariiqay baahida degdega ah ee loo qabo wadajirka caalamiga ah si wax looga qabto iskahorimaadyada sii kordhaya iyo dhibaatooyinka bini’aadantinimo, gaar ahaan Sudan, Gaza, iyo Ukraine. Soomaaliya waxay ku baaqaysaa in si deg deg ah loo joojiyo colaadaha ka aloosan deegaanadaas, waxayna carrabka ku adkaysay muhiimadda ay leedahay sharciga caalamiga ah iyo gargaarka bini’aadantinimo.
2. Difaaca Qaranimada Soomaaliya:
Farriin adag oo uu u diray beesha caalamka, ayuu Ra’iisul Wasaaruhu ku celceliyay in Soomaaliya ay xaq u leedahay in ay difaacdo midnimada dhulkeeda, gaar ahaan daandaansiga Itoobiya ee dhawaanahan. Soomaaliya waxay cambaaraynaysaa isku dayga sharci darrada ah ee ay Itoobiya ku doonayso inay ku wiiqdo madaxbannaanida Soomaaliya, waxayna ku boorinaysaa dhammaan ummadaha in ay ilaaliyaan mabaadi’da midnimada qaranka iyo wadajirka dhuleed, kuwaas oo muhiim u ah xasilloonida gobolka.
3. Adkeynta Nabadda iyo Amniga:
Ra’iisul Wasaare Barre ayaa iftiimiyay horumarka ballaaran ee Soomaaliya ay ka sameysay la dagaallanka argagixisada, gaar ahaan soo celinta 2/3 dhulkii ay maamulayeen Al-Shabaab. Waxaa sidoo kale la aqoonsaday guulaha laga gaaray howlgallada nabad ilaalinta sida AMISOM iyo ATMIS.
4. Dib u habaynta hay’adaha caalamiga ah:
Ra’iisul Wasaaruhu wuxuu u ololeeyay in dib u habeyn lagu sameeyo Golaha Ammaanka ee Qaramada Midoobay iyo hay’adaha maaliyadda ee caalamiga ah, taasoo ka tarjumaysa xaqiiqada dhabta ah ee juqraafiyeed ee maanta. Dib-u-habayntan, ayuu ku nuux-nuuxsaday, inay lagama maarmaan tahay si loo hubiyo in codadka Afrika iyo gobollada kale ee soo koraya ay si waafi ah uga muuqdaan go’aannada caalamiga ah.
5. Isbeddelka Cimilada:
Soomaaliya ayaa safka hore kaga jirta xiisadda cimilada, iyadoo ay ka jiraan xaalado cimilo oo aad u daran oo dhibaato u geysta dadkeeda iyo kheyraadkeeda. Ra’iisul Wasaaruhu wuxuu carrabka ku adkeeyay in loo baahan yahay in la fududeeyo helitaanka maalgelinta cimilada ee caalamiga ah si waddamada taagta daran ee Soomaaliya oo kale ay u dhistaan adkeysi iyo badbaado bulshooyinkooda. Abuuritaanka Sanduuqa Khasaaraha iyo Dhaawaca waa la bogaadiyay, laakiin baaqa ku aaddan helitaan caddaalad ah ayaa weli ah mid muhiim ah.
6. Dariiqa Horumarka dalkeena
Soomaaliya waxay diyaar u tahay kobac dhaqaale, iyadoo leh kheyraad aad u badan oo aan laga faa’iidaysan sida beeraha, xoolaha, tamarta la cusboonaysiin karo, iyo dhaqaalaha buluugga ah. Ra’iisul Wasaaraha ayaa ku dhawaaqay diyaarinta Qorshaha Isbadalka Qaran ee looga gol leeyahay in hantidaas looga faa’ideysto xasiloonida iyo horumarka dalka.
Iyadoo Soomaaliya ay isu diyaarinayso inay fadhigeeda Golaha Ammaanka ee Qaramada Midoobay 2025-ka, Ra’iisul Wasaaruhu wuxuu dib u xaqiijiyey sida ay qarankeenna uga go’an tahay horumarinta nabadda, dhinacyada badan leh, iyo shuruucda caalamiga ah. Soomaaliya waxay diyaar u tahay inay gacan ka geysato sidii loo heli lahaa nidaam caalami ah oo loo siman yahay oo nabdoon, iyadoo ka shaqaynaysa midnimada bulshada caalamka.
