Markii uu bilowday dagaalka Laascaanood bilowgii sanadkaan 2023 ka, magacyo badan ayaa soo shaac baxay, kuwaas oo hadal hayn ka dhaliyay baraha Bulshada Soomaalida. Cabdi Madoobe waa mid kamid ah.
War ka soo baxay Somaliland bishii Febraayo ee sanadkaan, ayaa markii ugu horaysay Somaliland waxay ku sheegtay inuu yahay ‘argagixiso’, uuna ka dagaalamayo gudaha Laascaanood, balse hadalkaas waxaa gaashaanka u daruuray odayaasha dhaqanka ee magaalada. Dhanka kale isaga oo khudbad ka jeedinayay gudaha Laascaanood afartii september ee sanadkaan ayuu sheegay in Somaliland isku dayday in ay wada hadal la gasho, dhaqaalana u balan qaadeen, inkatsa oo warkaas si madax banaan BBC u xaqiijin karin.
Jamhuuriyadda iskeed ugu dhawaaqday madaxbanaanida ee Somaliland ayaa mar kale shalay soo saartay bayaan ay ku sheegeyso in ciidamo argagixiso ah ay ku soo qulqulayaan gudaha Laascaanod, qayb kamid ahna ay ka imaanayaan xeryo uu leeyahay Cabdi Madoobe.
Haddaba waa Kumaa Cabdi Madoobe?
Sida aan ka soo xiganay dad ay qaraabo yihiin, Cabdi xuseen cali Kamiin oo ku magacdheer Cabdi Madoobe, ayaa horaantii sideetameeyadii ku dhashay gobolka Shabeelada Hoose ee Soomaliya.
Qoyskooda ayaa kamid ahaa dadkii abaar ka dhacday Wuqooyiga darteed loogu raray goblka Shabeelaha Hoose, isaga oo dugsi quraanka iyo waxbarashada hoose ku qaatay isla Shabeelaha Hoose.
Aabihiis waxa uu ahaa ganacsade, waxaanay sagaashameeyadii soo degeen magaalada Xamar-lagu-xidh oo 32km dhinaca koonfur ka xigta degmada Buuhoodle.
Ganacsi ayay ka samaysteen isaga iyo wallaalihii magaalooyinka Buuhoodle iyo Boosaaso. Isaga oo wax ka iibin jiray tukamaadooda.
Aabihiis Xasan Cali Kamiin oo daganaa Buuhoodle ayaa qiyaastii dabayaaqadii sagaashamaadkii ku geeriyooday.
Cabdi Madoobe waa hogaamiyaha ciidamada SSC khaatumo ee xilligaan, Markii ugu horeysay waxay dad badan ku baraarugeen bilowgii sanadkaan, kadib markii uu bilowday dagaalka u dhaxeeya Somaliland iyo dadka deegaanka.
Marar badan ayuu Cabdi Madoobe ka soo muuqday warbaahinta intii uu socday dagaalka. Waxaa kamid ah mar uu la wareegayay ciidamo la sheegay inay ka tirsanaayeen Somaliland bishii May ee sanadkaan, kuwaas oo ku soo biirayay jabhadda SSC oo uu gudoomiye ka ahaa Cabdi Madoobe. Xilligaas ayaa laga duubay muuqaal isaga oo ku sugan deegaanka carro-weyn ee ka tirsan Ceyn.
“Ciidanku ma noqonayo ciidan iska fadhiye oo aan shaqaynayn” ayuu ka yiri goobtii uu kula wareegayay ciidamada, Cabdi Madoobe.
Mar kale oo uu warbaahinta ka soo muuqday ayaa ah markii ciidmada SSC ay la wareegeen saldhigii ciidmada Somaliland ee Goojacadde dhamaadkii bisha August. “Dagaalka manta wuxuu noqday mid taariikhda galay, oo ku galay in lagu kala baxay 25 daqiiqo” ayuu yiri Cabdi Madoobe oo sheegay inuu ku sugan yahay deegaanka Guumeys.
Markii ugu dambeysay ee uu warbaahinta ka soo Muuqday Cabdi Madoobe ayaa ah bishaan aan ku jirno ee Spetemper, isaga oo khudbad ka jeedinayay goob ay dadweyne badan ku sugnaayeen, oo dabcan ahayd hool munaasabad ka dhacaysay.
Khudbad uu ka jeediyay goobtaas ayaa ahayd mid uu inta badan ugu mahadcelinayay dad uu sheegay inay halganka uu galay ka gacan siiyeen oo dhallin yaro u badan.
Cabdi adoobe ayaa ah taliye ciidan oo maqaam weyn ku leh gudaha Laacaanood, kaas oo ay ixtiraamaan dad badan oo reer Laascanood ah. Dhanka kale Somaliland ayaa u aqoonsan nin argagixiso ah oo khatar ku ah amniga deegaanadooda oo dhan.
