Cali Ibraahim Cabdi oo ka tirsanaa kooxda Al-Shabaab, una qaabilsanaa qeybta ay ugu yeeraan jabhadaha ayaa maanta isku soo dhiibay ciidanka xoogga dalka Soomaaliyeed, gaar ahaan qaybta 60-aad.
Cali ayaa sidoo kale wuxuu ciidanka dowladda u sheegay in dhibaatooyin badan uu la kulmay sanadihii uu ka tirsanaa kooxda Al-Shabaab, sida ay baahisay warbaahinta dowladda.
Cali Ibraahim Cabdi ayaa ugu dambeyntiina wuxuu ugu baaqay saaxiibadiis kale ee weli ku harsan kooxda Al-Shabaab inay isku soo dhiibaan ciidanka dowladda, xilli dalka uu ka socdo guluf ka dhanka ah kooxda.
Dowladda federaalka Soomaaliya ayaa muddooyinkii dambe soo bandhigaysay xubno ka tirsanaa kooxda Al-Shabaab oo isku soo dhiibay, kuwaasi oo ka faa’iideysanaya cafis ay dowladda u fidisay xubnaha kooxda.
Dagaalka ka dhanka ah Al-Shabaab ayaa tan iyo markii uu billowday waxaa kooxda looga saaray deegaano horleh, inkasta oo ay weli ku xooggan yihiin qeybo kamid ah dalka, xilli uu billaabanayo wejiga labaad ee dagaalka oo ay qeyb ka noqonayaan ciidamo ka socda dalalka deriska.
