Wararka ka imaanaya gobolka Bari ee Puntland ayaa sheegaya in weli ay xiran yihiin qaar ka mid ah goobaha ganacsiga ee magaalada Boosaaso, cabsi laga qabo darteed kooxda Daacish ee ku sugan dhulka baraleyda Galgala.
Muddo todobaad ah ayaa waxaa xiran xarumaha ganacsiga shirkadaha Towfiiq, Gufurre, Horseed iyo Oomaar, kuwaas oo albaabada la’isugu dhuftay, sida ay ogaatay mudug24.
Saddex shirkadood ayaa waxaa soo wajahday cabsi xoogan oo ku aadan in la gubi doono xarumahooda, si lamid ah shirkadihii dhawaan lagu gubay magaaladaasi.
Khilaafka soo kala dhex-gaay ganacstada iyo Daacish ayaa yimid, kadib markii ay kooxda ku amartay inay ganasatadu bixiyaan lacago canshuuro oo boqolaal kun oo dollar ah, haddii kalena ay la kulmi doonaan weeraro, hanjabadaas ayaana keenay inay xiraan mehradahooda.
Dhanka kale ma jiro wax hadal ah oo ka soo baxay saraakiisha laamaha ammaanka Puntland oo ku aadan xiisadda ka taagan magaalada Boosaaso ee saameynta ku yeelatay dhaq-dhaqaaqa ganacsiga magaaladaas.
Ma’aha markii ugu horreysay oo ay Daacish ay xirto ganacsiga Boosaaso, waxayna dhacday dhowr jeer oo hore, taas oo saameyn ku yeelatay ganacsatada ku dhaqan magaaladaasi.
