“Aniga waxaan ku jiri jiray baraha bulshada, sidaas darteed, waalidkeyga way igu garab istaageen wax jilista”
Waa Shukri Cabdulqaadir Cabdi, oo ka mid ah jilaayaasha filimka Arday, oo ah filim dhinacyo badan taabanaya kana sheekeynaya nolosha dhalinyarada, gaar ahaanna ardaynimada.
Waxay Shukri filimka ku jileysaa magaca Saynab, waxayna mataleysaa gabar iska dhicineysa dadka dhibaatooyinka u geysanaya, gaar ahaanna dhalinta.
Waa markii ugu horreysay oo ay Shurki oo 21 jir ah jisho filim. “Waxaan ku doortay wax jilista waa hiwaayad aan jeclaa yaraanteydii.
Waxay ku dhalatay dalka Sacuudiga kuna barbaartay, magaalada Muqdisho oo ay keliya afar sano joogto, wax jilista kalama kulmin caqabado badan, marka laga reebo caqabadaha ay ka siman yihiin gabdhaha Soomaalida.
“Waxaa ka mid ah in gabdhaha loo diido inay ka soo muuqdaan fanka,” ayay tiri Shukri.
Sidoo kale qoyskeeda kalama aysan kulmin diidmo ah inay wax jisho, balse qaar ka mid ah qaraabadeeda ayaa kula taliyay inay fiicnaan lahayd inaysan ka soo muuqan shaashadaha.
Maxaa diiradda lagu saarayaa Arday?
Filinkan oo ka mid ah kuwii ugu horreeyay noociisa ee lagu jilo magaalada Muqdisho tobnaan sano kaddib, waxaa inta badan ka qeyb qaadanaya dhalinyaro ku koray magaalada Muqdisho, oo ay dagaallo iyo qaraxyo saameeyeen.
Waxaa filimka maalgeliyay Bilan Media, oo xaruntoodu tahay magaalada Muqdisho. “Waxaan rabay inaan dareemaha dhalinyarada qaab uun aan u sheego. Sida ugu fudud waxay ila noqotay ardayda fasalka fadhiya. Arday walba wuxuu leeyahay sheeko u gaar ah,”
Sidaasi waxaa BBC-da u sheegay Axmed Faarax oo ah hagaha filimka Arday oo dhowaan lagu soo bandhigay magaalada Muqdisho.
Filimkan oo ka kooban 10 xalqadood, ayuu sheegay inuu taabanayo dhinacyo badan oo ka mid ah nolosha dhalinyarada.
“Waxaan xoogga saarnay ilaa shan qeybood, oo qeybta ay Shukri jileyso ka mid tahay. Waxaa kale oo aan xoogga saarnay kufsiga, gabdhaha muuqaallada qaawan laga duubo ee lagu rikaateeyo, duruufta ardayda, ragga dibadda ka imaanaya ee gabdhaha yaryar guursanaya, qaraxyada iyo amni-darrada Muqdisho, iyo qeybo kale,” ayuu yiri Axmed.
In Muqdisho lagu duubo filim, wuxuu Axmed leeyahay waxaa ku xeeran caqabado.
“Caqabadaha ugu badan ee ina heysta waa magaalada oo aan u diyaarsaneyn in wax lagu duubo. Buuqa iyo sawaxanka, aadaanka Salaadda oo masaajiddu aysan isku waqtiyo ahayn, iyo dadkii oo aan fahansaneyn ujeedka filimka,”
Filinkan oo duubistiisa ay qaadatay ilaa sadex bilood iyo bar, Axmed oo filimkan uusan ahayn kii ugu horreeyay ee uu hago, wuxuu leeyahay, “waa filimkii ugu horreeyay noociisa ee Muqdisho lagu soo bandhigo muddo 30 sano ah, sababtoo ah wuxuu la mid yahay musalsallada dhalinyarada ee caalamka,”
Filimka Arday oo hordhaciisa dhowaan la sii daayay, waxaa daawatay malaayiin qof.
Axmed ayaa sheegay in aad loo soo dhoweeyay filimkan, marka laga reebo cambaaren meelaha qaar uga timid.
“Maalmihii hore waxaa jiray ururro dhanka waxbarashada ah oo yiri dhaqan-xumo ayaad waddaan iyo iskuullada ayaa wax laga sheegayaa, laakiin markii dambe waan u sharraxnay.” Ayuu yiri Axmed.
Waxaa la filayaa in dhammaadka bishan la sii daayo filimkan Arday.
