Stockholm, Sweden – Yaraanta ba’an ee deeq-bixiyeyaasha shahwada ee gobolka Stockholm ayaa ku qasabtay maamulka caafimaadka inuu shahwo ka soo iibsado Denmark. Mas’uuliyiintu waxay sheegeen in xalkaan uu yahay mid qaali ah, isla markaana laga yaabo inuu khilaafsan yahay qaar ka mid ah xeerarka ka jira Sweden.

Sannad kasta, in ka badan 2,000 oo qof ayaa adeegyada caafimaadka ee Stockholm u raadsada caawimaad dhanka taranka. Ku dhowaad 355 ka mid ah dadkaas waxay u baahan yihiin shahwo deeq-bixiye, hase yeeshee tirada ragga isdiiwaangeliya ee deeqda bixiya ma dhaafto 25 qof sannadkii.

Dr. Tekla Lind, oo ah ku-simaha madaxa qaybta caafimaadka taranka ee Isbitaalka Jaamacadda Karolinska, ayaa sheegtay in gobolka uu u baahan yahay ugu yaraan 80 deeq-bixiye sannadkii si loo daboolo baahida jirta loona gaaro isku filnaansho.