Dowladda federaalka ah ee Soomaaliya iyo Mareykanka ayaa heshiis cusub kala saxiixday, kadib kulan maanta ka dhacay magaalada Muqdisho.
Heshiiskan ayaa gundhigiisa waxa yahay dhisidda ciidamada Xoogga dalka, gaar ahaan kuwa Danab, sida uu shaaciyay wasiirka wasaaradda gaashaandhigga Soomaaliya.
“Waxaan maanta aniga iyo Danjiraha Mareykanka Mudane Larry André is-afgarad ku kala saxiixanay magaalada Muqdisho, kaas oo gundhiggiisu yahay dhisidda ciidamada XDS ee Danab. Waxaan Isku afgaraney xoojinta dagaalka lagula jiro Khawaarijta” ayuu yiri Jaamac.
Jaamac ayaa sidoo kale xusay in qorshahan uu qayb ka yahay isku filnaansho ciidamada Xoogga dalka, si ay amniga ugala wareegaan ciidamada howlgalka ATMIS.
“Ahmiyadda is-afgaradkan waa in tababbar iyo qalabeyn loo sameeyo CXDS ee Danab, si loo gaaro isku filnaansho Ciidamada Qalabka Sida ay kula wareegi karaan guud ahaan amniga dalka” ayuu markale sii raaciyay.
“Waxaan Dowladda Mareykanka uga mahad celineynaa taageerada uu mar walba la garab taagan yahay Dowladda Soomaaliya,” ayuu ku soo gabagabeeyay qoraalkiisa.
Mareykanka ayaa kamid ah dalalka sida tooska ah uga qayb-qaata dagaalka Al-Shabaab, isaga oo dhanka hawada ka taageera ciidamada Soomaaliya ee howlgallada ka wada dalka.
