Manchester United ayaa lagu soo waramayaa inay aqoonsatay seddex weeraryahan oo macquul ah oo ay la soo saxiixan karaan inta lagu guda jiro suuqa kala iibsiga bisha Janaayo ka dib markii ay ku guuldareysteen inay helaan Cody Gakpo .
Red Devils ayaa si weyn loola xiriirinayay xiddiga heerka caalami ee dalka Netherlands, laakiin waxaa saxiixiisa ku garaacay kooxda ay xafiiltamaan ee Liverpool .
Inkastoo ay wayday Gakpo, United ayaa wali dooneysa inay lasoo saxiixato weeraryahan cusub ka dib bixitaankii Cristiano Ronaldo bishii November.
Sida laga soo xigtay The Mirror , waxa ay diyaariyeen liis ka kooban saddex ciyaaryahan oo ay ku jiraan Rafael Leao , Dusan Vlahovic iyo Goncalo Ramos , kuwaas oo u kala ciyaara AC Milan , Juventus iyo Benfica .
Heshiiska Leao ee haatan waxa uu dhacayaa ilaa June 2024, halka Vlahovic iyo Ramos ay heshiis kula jiraan kooxahooda ilaa xagaaga 2026.
Si kastaba ha ahaatee, United ayaa la rumeysan yahay inay raadineyso suurtagalnimada saxiix amaah ah halkii ay ka ahaan lahayd heshiis joogto ah ka dib markii ay qarash gareeyeen ku dhawaad 230 milyan ginni intii lagu jiray suuqa kala iibsiga xagaagan.
