Madaxa kooxda calooshood u shaqeystayaasha ah ee Wagner ayaa ka tegi doona Ruushka, mana wajihi doono wax dacwado ah kadib markii uu baajiyey duullaankii ciidankiisa ee Moscow, waxaa sidaas sheegay Kremlin-ka.
Hase yeeshee, waxaa xalay lagu dhowaaqay heshiis, ayada oo Kremlin-ka uu sheegay in Yevgeny Prigozhin uu tegi doono dalka Belarus, halka Ruushka aysan maxkamadeyn doonin isaga iyo ciidankiisa.
Prigozhin ayaa sheegay inuu dareesan yahay muhiimadda xilligan, islamarkaana aanu dooneyn “inuu daadiyo dhiigga Ruushka.”
“Waxay doonayeen inay kala diraan shirkadda militari ee Wagner. Waxaan 23-kii June billownay socodka cadaaladda ee aan ku tageyno Moscow. 24 saac gudahood, waxaan 200 km u jirsanay Moscow, innaga oo aan xitaa ridin hal xabbad,” ayuu Prigozhin ku yiri farriin cod ah.
Saacadihii hore ee Axadda maanta ah, Wagner ayaa billowday inay ciidamadeeda kala baxdo magaalada Rostov, halkaasi oo ay Sabtidiii qabsatay xarumo militari.
Hase yeeshee kahor inta aanay bixin, dadka deegaanka ayaa ku qaylinayey “Wagner! Wagner!” ayaga oo ku sugan dibedda xarumaha ay qabsadeen.
Hoggaamiyaha Belarus Alexander Lukashenko ayaa sheegay inuu xabad-joojin kala xaajooday Prigozhin, taasi oo Moscow ay uga mahad-celisay.
Afhayeenka Kremlin-ka Dmitry Peskov ayaa goor dambe weriyayaasha u sheegay “Kiis dambiyeed ka dhan ahaa Prigozhin waa laga laaban doonaa. Isagana wuxuu aadi doonaa Belarus.”
