Agaasimaha Guud ee Waaxda Nadaafada iyo Bilic soo celinta Maamulka Gobolka Maxamed Suudi oo xalay warbaahinta kula hadlay Waddada Sodonka ayaa faahfaahin ka bixiyay qarax lagu soo dhex qariyay qashin oo habeen hore ka dhacay gudaha Muqdisho, kaas oo sababay khasaare soo gaaray muwaadin Soomaaliyeed.
Sidoo kale wuxuu ka digay dhibaatada ka dhalan karta qashinka oo si guud marka loo eego halis ku ah bulshadeenna.
“Qashinka laamiyada lasoo dhigaayo oo xalay ayaa u dambeysay ay dhibaato kasoo gaartay muwaadin Soomaaliyeed inta qashin bac lagu soo qariyay waxyaabaha qarxa lasoo dhex-dhigay” ayuu yiri agaasimaha guud ee nadaafadda iyo bilic soo celinta gobolka.
“Dadka noocaas sameynaayo waxaan rabnaa inaan halkan digniin uga dirno qashin yaraa laamiga iska dhigaayay lagaama aqbalaayo, waxaad garab siineysaa nabad-diidka” ayuu raaciyay.
“Reer Muqdisho waxaan leeyahay nadaafadda guud ahaan iyo gaar ahaan ka shaqeeya” ayuu mar kale yiri agaasime Maxamed Suudi.
Magaalada Muqdisho ayaa waxaa haatan ka socda olole ballaaran oo uu horkacayo maamulka gobolka Banaadir, si ooo horumariyo caasimada iyo dhismayaasheeda.
