Guddoomiye ku xigeenka amniga iyo siyaasadda maamulka gobolka Banaadir, Maxamed Axmed Diiriye (Yabooh) ayaa shaaciyay xog ku aadan halka uu joogo ninka baxsadka ah ee xaaskiisa ku gubay magaalada Muqdisho.
Sidoo kale wuxuu beeniyay in ninkaasi uu ka dhoofay garoonka diyaaradaha ee magaalada Muqdisho, sida horay loogu sheegay warar soo baxayay.
“Waxaan rabaa inaan ku xaqiijiyo ninkaas inuu hadda joogin magaaalada Muqdisho, uuna ka baxay dhowr maalmood kahor, waxaan arkaayay meelo ay ku qoran tahay garoonka ayuu ka baxay ninkaasi garoonka kama uusan bixin dhulkuu ku baxay, haddana gobollada dhexe meelo kamid ah ayuu joogaa” ayuu yiri guddoomiye Maxamed Yabooh.
“Qofka haddii baaritaan lagu haayo ogaashihiisa waa kasii duwan tahay Sayd Cali Muqdisho ma joogo, dhowr maalmood kahor ayuusan joogin, sida ay xogta nagu soo gaareyso isla markiiba maalin kadib magaalada waa uu ka baxay” ayuu hadalkiisa sii raaciyay.
“24-kii saac ee ugu dambeysay ayaan dadaal ku bixineynay, haddana weli juhdiga waa socdaa, marka dhacdadaas waxaa waayay waa mid aan aad uga xunahay” ayuu yiri.
Booliska Soomaaliyeed ayaa dhankiisa sheegay in la rumeysan in ninkan uu u baxsaday gobollada dalka, kadib markii uu dhibaatada ka gaystay magaalada Muqdisho.
Si kastaba, falkan argagaxa leh ayaa dhaliyay carro xoogan, waxaana weli cadaalad dalbanaya ehellada marxuumadda oo sheegay in aan la aasi doonin inta laga soo qabanayo ninka gubay, waxaa sidoo kale arrintaan si kulul uga hadlay baarlamaanka Soomaaliyeed
