Faahfaahino dheeraad ah ayaa waxaa laga helayaa dhacdo argagax leh oo saaka ka dhacday waaxda Carafaad oo ka tirsan gudaha deegaanka Garasbaaley ee duleedka magaalada caasimada ah ee Muqdisho, kadib markii uu nin mu’adin ah uu masaajid ku yaalla deegaankaas ka dhexe geystay dil iyo dhaawac.
Mu’adinka ayaa la sheegay inuu dilay Imaamkii Masjidka, kadib shaqaaqo ka dhex-dhacday gudaha masjidka, waxaana sidoo kale uu dhaawacay wiil kale oo dhalinyaro ah.
Dhacdada ayaa timid muran soo kala dhex-galay wiilka yar oo gacan yare u ahaa imaamka geeriyooday iyo wadaadka mu’adinka ah, waxaana meesha ka dhacay gacan ka hadal.
Mid kamid ah dadka deegaanka oo la hadlay Idaacadda Kulmiye ayaa sheegay in imaamka oo sidoo kale ahaa Macallin Dugsi uu isku dhigay wiilka yar, kadib markii mu’adinka uu soo qaatay baangad, waxayna baagadii ku dhacday marxuumka oo isla goobta ku geeriyooday.
Labada nin ayaa saaka saaladdii subax midna uu aqimay, midnaa uu salaadda tujiyay jamaacada masjidka, sida uu sheegay qofka goobjoogaha ah.
“Saaka Garasbaaley shaqaaqo aan la yaabnay ayaa ka dhacday laba nin oo masaajidka midna imaam ka ahaa midna mu’adin ayaa is qoomay oo is dilay. Labaduba salaadda subax mid waa aqimay midna dadkii ayuu tujiyay,” ayuu yiri qof kamid ah dadka deegaanka.
