Madaxweynihii hore ee Soomaaliya Shariif Sheekh Axmed ayaa sheegay in haddii uu markale dib loo doorto la dhamaystirayo dastuurka qabyada ah isla markaana shacabka looga qaadi lahaa afti.
Shariif Sheekh Axmed guddoomiyaha Midowga Musharaxiinta ayaa bartiisa facebook soo dhigey qoraal uu ugaga hadlayo sanadguurada lixdanaad ee ku beegan maalintii shacabka Soomaaliyeed ay ansixiyeen dastuur.
Qoraalka Shariif Sheekh Axmed ayaa u qornaa sidan;
Maanta oo kale 60 sano ka hor waa maalin ku weyn Dalkeenna, waa maalintii ugu horeeysey ee umadda Soomaaliyeed ay afti u qaadeen, kuna ansixiyeen dastuurkii ugu horeeyey ee Jamhuuriyadda Soomaaliya 20June1961.
Waxa uu ahaa mid kamid ah dastuurrada heshiis bulsho ee caalamka ugu fiican, qaaradda Africa oo aan ka tirsannahayna ka ahaa tusaalaha ugu fiican, balse gabi ahaanba la baa’biyey markii Milatarigu ay afgambi talada Dalka ku qabsadeen 21 October 1969.
60 sano kadib maalintaas qiimaha weyn noogu fadhida, maanta waxaan haysannaa
Dastuur qabya ah oo intii aan xafiiska joognay aan diyaarinay, hayeeshee 8 sano kadib oo laba Dowladood ay is bedeleen weli aan la dhamaystirin.
Waxaan umadda Soomaaliyeed u xaqiijinaynaa haddii aan xafiiska kusoo noqonno Bi’idnillah, inay naga go’an tahay sidii aan u dhamaystiri lahayn dastuurkaas qabyada ah, Soomaaliyana ugu sameyn lahayn Dastuur rasmi ah, afti dadweyne lagu ansixiyo marka tirakoob shacab aan sameyno.
