Allaha u naxariistee waxaa shalay shil gaari ku dhintay Jaamac Faarax Nuur – wiil dhalinyaro ah oo u ballansanaa in uu aroos galo maalinta talaadada ee berri.
Wuxuu ka yimid magaalo xeebeedka Boosaaso oo uu ka shaqaynayey, wuxuuna ku wajahnaa degmada Dhudhub ee gobolka Bari si uu maalinta berri ah ugu aqal galo.
Dadka ayaa si joogta ah ulasoo xiriirayay inta uu safarka ku jiray, qaarkood way u hambalyeynayeen halka kuwa kale ay hadiyado ka sugayeen maadaama uu yahay nin ka imanaya caasimad.
Waxaa la diyaariyey aqalkii arooska, faraxad iyo raynrayn ayaa lagu sugayey, waxaana ka mid ah dadka sugayey hooyadiis, aabihiisa iyo xaaskiisa cusub Nasteexo Siciid Nuur.
Jaamac wuxuu dhankiisa soo iibiyey qaar ka mid ah adeeggii arooska, “nin adeeg sidabuu ahaa, alaabo dhan soo qaaday, marka hadba qofbaa soo wacayey, qof u hambalyeynaya iyo mid alaab ka sugayeyba,” ayuu yiri Cabdiqani.
Wuxuu dabcan si fiican u qorsheeyay maalinta ‘ugu farxadda badan noloshiisa’ balse qorshaha eebbe ayaa sidaas ka duwanaa. “Ninkaas qorshihiisu wuxuu ahaa in uu aroos galo maalinta talaadada, laakiin xukunka rabbi umbaa kasoo hor maray, isagoo waliba dharkii arooska soo gadtay oo adeeggii arooska soo gadtay oo waxba aan ka maqnayn… isaga umbaa la sugaayey alaabtu way diyaarsanayd oo aqalka waa la gaday, marka qorshuhu wuxuu ahaa manta inuu degmada yimaaddo, caawana adhiga la qalo beritana aroosku dhoco.” Cabdiqani ayaa sidaasi noo sheegay.
Cabdiqani Siciid wuxuu sheegay in ay geeridu si gaar ah u saameysay maadama uu marxuumku walaalkiis ahaa isla mar ahaantaana ay muddo soo wada shaqaynayeen, “shakhsiyan walaalkaybuu ahaa, nin wuxuu ahaa aan meel kusoo wada kornay shaqa wadaagna aan ahayn,” ayuu yiri Cabdiqani.
Dadkii sida joogatada ah u wacayey taleefankiisa gacanta ayaa loo sheegay in ninka ay soo wacayaan uu shil galay isla markaana uu ku jiro koomo, “hadba siduu qof usoo wacayey waxaa mid ka mid ah dadkii lagu yiri [ninka aad soo wacaysaani koomuu ku jiraa, nolol iyol geeribuu u dhexeeyaa,” ayuu yiri cabdiqani oo ay habro wadaag yihiin Alle haunaxariistee Jaamaca Faarax.
Kumuu ahaa Jaamac?
Sida aan kasoo xigannay ehelkiisa, Jaamac wuxuu ahaa wiil dhalinyaro ah oo dhammeeyay waxbarashada hoose dhexe illaa heer jaamacadeed. Muddadii u dambeysayna wuxuu ka shaqaynayey garoonka diyaaradaha magaalada boosaaso, “Waxbarasho waa dhameeyay, iskuulbuu ka baxay kadibna jaamacadbuu ka baxay hadana ereboodka ayuu ka shaqaynayey,” ayuu cabdiqani.
Sida uu cabdiqani sheegay, qiyaastii shanti sano ee u dambeysay wuxuu Jaamac ka shaqaynayey garoonka diyaaradaha magaalada Boosaas, wuxuuna ahaa nin markiisii u horeysay aroos galaya.
Jaamac wuxuu ahaa madi hal gabar oo kaliya ay la dhalatay, “hooyadiisna isaga iyo gabarbay dhashayba… iyo aabihiis labaduba, isaga ayaa wiil u ahaa reerka,” ayuu yiri Cabdiqani Siciid Maxamed oo ah ehelka marxuumka oo BBC-da la hadlay.
Xaaska ay asaydu fuushay iyo labada waalid ee Jaamac ayeysan noo suurta gelin in aan la hadalno maadaama ay ku jiraan xaalad naxdin ah, “wallaahi lagama sheekayn karo, reer farxad isu diyaariyay hadana murugo u taal waa dareemaysaa… maamadii shalay markii loo sheegay illaa hadda waxna ma cunayso mana hadlayso,” ayuu yiri cabdiqani. “Aabuhu xoogaa waa ka yar adagyahay balse ma hadli karo, waa dareemi kartaa guri farxad ka jirtay oo geeri usoo hoyatay.” Ayuu sii raaciyey cabdiqani Siciid maxamed.
Jaamac ayaa u geeriyooday dhaawac halis ah oo kasoo gaaray shil uu shalay ku galay inta u dhaxaysa magaalooyinka Boosaaso iyo Qardho, wuxuuna ku wajahnaa degmada Dhudhub oo arooskiisa laga diyaariyey balse Alle haunaxariistee wuxuu caawa u hoyanayaa gurigiisa dhabta ah, manta ayaana la aasay.
Waxaa shilka ku dhaawacmay dhowr qof oo kale balse Jaamac oo kaliya ayaa dhaawicii u geeriyooday.
