Ciidamada Mareykanka ayaa Sabtida maanta ah fuliyay duqeymo cirka ah oo ka dhan ah bartilmaameedyada kooxda Daacish ee gudaha Soomaaliya, sida uu shaaciyay Madaxweyne Donald Trump.
“Saaka waxaan amar ku bixiyay in weeraro cirka ah oo si gaar ah loola beegsanayo lagu qaado worsheeyaha sare ee weerarada Daacish iyo argagixisada kale ee uu ku soo qortay kuna hoggaaminayay gudaha Soomaaliya,” ayuu Trump ku yiri qoraal uu soo dhigay bartiisa Truth Social.
Xoghayaha Gaashaandhigga Mareykanka Pete Hegseth ayaa isna sheegay in weerarada lagu beegsaday xubno ka tirsan Daacish-Soomaaliya oo ku sugnaa buuraha Golis ee gobolka ismaamul hoosaadka Puntland.
“Qiimaynteena horudhaca ah waxay muujinaysaa in dhowr xubnood lagu dilay duqeymaha cirka ah, ayna jirin waxyeello soo gaartay dad rayid ah,” ayuu Hegseth ku yiri war-saxaafadeed uu soo saaray.
“Tallaabadan ayaa sii wiiqaysa awoodda Daacish ee ah inay qorsheeyaan oo ay fuliyaan weeraro argagixiso oo khatar ku ah muwaadiniinta Mareykanka, saaxiibbadayada, iyo dadka rayidka ah ee aan waxba galabsan, waxayna farriin cad u direysaa in Mareykanku mar walba u diyaar garoobayo inuu helo oo uu ciribtiro argagixisada khatarta ku ah dalka Mareykanka iyo xulufadiisa.”
Kooxda Daacish ayaa joogitaan kooban ku leh gudaha Soomaaliya marka loo eego kooxda Al-Shabaab ee xiriirka la leh Al-Qaacida, laakiin khubarada ayaa ka digay dhaq-dhaqaaqooda oo la sheegay inuu sii kordhayo.
“Fariinta loo dirayo Daacish iyo dhammaan kuwa kale ee weerari lahaa dadka Ameerikaanka ah waa ‘WAAN IDIN SOO HELAYNAA, WAANA IDIN DILAYNAA!’,” ayuu Trump ku soo gaba-gabeeyay qoraalkiisa.
Waa wareerkii ugu horreeyey ee Mareykanka uu ka fuliyo Soomaaliya tan iyo markii uu Trump xilka dib ula wareegay 20-kii Janaayo, 2025.
