Muuqaal laga dheehan karo dublamaasi Israa’iil ah oo lagu magacaabo Sharon Bar-li, oo laga soo galbiyay shirka madaxda Midowga Afrika, ayaa ku dhex wareegaya internetka.
Wargeyska Times of Israel oo soo xiganaya afhayeen u hadlay wasaaradda arrimaha dibadda Israa’iil, ayaa ku eedeeyay Koonfur Afrika iyo Aljeeriya inay mas’uul ka yihiin dhacdadan.
Muuqaalkan ayaa u muuqda mid muujinaya ilaalo ku soo wajahan wafdiga Israa’iil, xilli ay xafladda furitaanka ay socotay.
Waxaa jirtay dood dhex martay kooxdii ilaalada ahayd iyo Bar-Li, oo ah ku xigeenka aggaasimaha guud ee Israa’iil ee dhanka Afrika, ka dibna waxaa goobtii ka saaray nin ilaalo ah.
“Israa’iil waxay si dhab ah isha ugu haysaa dhacdadii ku xigeenkii Afrika, Ambassador Sharon Bar-Li, loogaga saaray hoolka Midowga Afrika, inkastoo ay ahayd goob-jooge la aqoonsan yahay oo leh maqaan wanaagsan,” afhayeenka wasaaradda arrimaha dibadda, Lior Hayat, ayaa waxaa kasoo xigtay wargeyska Times of Israel.
“Waa wax laga xumaado in la arko in Midowga Afrika ay afduubteen dalal yar oo xag-jir ah sida Aljeeriya iyo Koonfur Afrika, oo ay dabada ka riixayso nacayb ayna maamusho Iran,” ayuu yiri Hayat.
“Waa inay caddeeyaan sheegashadooda,” sidaasi waxaa yiri afhayeen u hadlay madaxweynaha Koonfur Afrika, oo ay soo xiganayso wakaaladda wararka ee AFP.
Maqaamka Israa’iil ee Midowga Afrika, ayaa dhawaanahan laga doodayay.
Waxay heshay maqaam goob-jooge ah sannadkii 2021-kii, balse go’aankan ayaa la is-weydiiyay, iyadoo Falastiiniyiintu ay ku booriyeen in dib loo eego, waxaana la sameeyay guddi sannadkii hore soo eega arrintan.
Sanadihii la soo dhaafay, Israa’iil, ayaa waxay rabtay in ay xiriir dhow la sameyso dalalka Afrika.
Horraantii bishaan, madaxweynaha dalka Chad, Mahamat Idriss Deby Itno, ayaa ku sugnaa Israel, si uu safaarad uga furo magaalada Tel Aviv.
