Faahfaahino dheeraad ah ayaa waxaa laga helayaa dagaal u dhexeeyay laba maleeshiyo beeleed oo gelinkii dambe Talaadadii ka dhacay deegaano hoostaga gobolka Shabeelaha Dhexe ee dowlad goboleedka HirShabelle.
Wararka ayaa sheegaya in dagaalka uu daba socdo muran ka dhashay dhul beereed ku yaalla halkaasi oo ay isku qabteen laba beelood oo kasoo kala jeeda deegaanadaasi.
Guddoomiyaha deegaanka Bacaadley oo la hadlay Idaacadda Kulmiye ayaa ka warbixiyay dagaalkaasi, wuxuuna sheegay in boob lagu hayo beerahooda, lagana dhaawacay hal wiil.
Sidoo kale Abuukar Maxamed oo kamid ah waxgaradka deegaanka Qalilmow oo isna la hadlay Idaacadda Kulmiye ayaa sheegay in duulaanka lagu soo qaaday, loona adeegsaday hubka dowladda, sida uu hadalka u dhigay.
Abuukar ayaa sidoo kale xaqiijiyay in dagaalkii shalay looga dhaawacay ugu yaraaan laba qof oo ay soo gaartay waxyeelo halis ah.
Waxaa kale oo uu farriin u diray maamulka gobolka Shabeelaha Dhexe oo uu ka codsaday inay soo farageliyaan xiisadda dagaal ee ka taagan halkaasi.
“Waxaan dalbaneynaa in maamulka gobolka uu arrintaan soo farageliyo ama uu soo diro guddi xaqiiqo raadin ah” ayuu hadalkiisa sii raaciyay.
