Faah-faahino dheeraad ah ayaa waxaa laga helayaa howl-gal qorsheysan oo ay saaka ciidamada dowladda ka fuliyeen degmada Afgooye ee gobolka Shabeellaha Hoose.
Ciidanka Haramcad ayaa howl-galkaan waxay ku burburiyeen maxkamad beenaadkii kooxda Al-Shabaab ay ku laheyd deegaanadaasi, sida ay shaacisay wasaaradda warfaafinta Soomaaliya.
“Howl-galkaan ayaa ku dhacay si nabad ah, kadib kolkii ay halkaasi isaga carareen kooxda Khawaarijta Al-Shabaab ee sida dhuumaaleysiga ah u jooga Shabeellaha Hoose,” ayaa lagu yiri bayaan kooban oo kasoo baxay wasaaradda.
Ciidamada dowladda ayaa sidan oo kale hore u burburiyay maxkamado ay kooxda ku laheyd duleedka Muqdisho iyo deegaano kale, kuwaasi oo ay ugu yeeri jirtay bulshada caasimada.
Howl-galkan ayaa imanaya, ayada oo uu hakad galay dagaalkii ka dhanka ahaa kooxda Al-Shabaab, oo aysan dowladda muddo qaadin wax howl-gal ah oo muuqda oo ka dhan ah kooxda Al-Shabaab.
