Kadib toogashadii dhiigga badan ku daatay ee ay ka fuliyeen burcadda aagga Järva ee gobolka Stockholm, xagaagii la soo dhaafay, inta u dhexeysa 10 ilaa 20 qoys ayaa ka helay booliiska iyo adeegga bulshada caawimaad ay uga guuraan aaggaas, iyadoo ujeedadu tahay in la ilaaliyo carruurta iyo sidoo kale joojinta dariiqa dembiyeed ee carruurta qaar.Kuwa ku lugta leh kooxaha gaangiska.
Xagaagii la soo dhaafay, waxaa dhacay seddex dil labo bilood gudahood – tan iyo waqtigaas, toogasho badan ayaa lala xiriiriyay isku dhaca u dhexeeya kooxaha gaangiska ah ee xaafadaha Rinkeby, Husby iyo Tenista.
Sida ay booliisku sheegeen, in badan oo ka mid ah dadka ku lugta leh ayaa ah dhalinyaro, ka yar 18 sano, qoysas badanna waxay ka baqayaan in wiilkoodu noqdo kan la dilayo marka xigta, ama la dili doono.
Saldhigga cusub ee booliska ee ku yaal Rinkeby, booliska iyo adeegga bulshada ayaa si dhow uga wada shaqeynaya sidii loo jabin lahaa isbeddellada iyo taageerada qoysaska.
Taliyaha Booliska Stephan Kiernan ayaa sheegay in qoysaska qaar ay kaxeysteen caruurtooda oo ay ula safreen dibada, qaarna ay heleen caawinaad ay ugu guuraan deegaano kale.
Wuxuu ku tilmaamay natiijada mid aad u wanaagsan. Laakiin waxaan u maleynayaa inay sidoo kale tahay wax cabsi leh inay jiraan qoysas aad u tiro badan, oo weli haysta dhalinyaro u baahan inay isbedel noocaas ah ku sameeyaan noloshooda.
“Maxaad sameyn laheyd waalid ahaan hadii 17-jirkaaga uu ka mid yahay koox dambiilayaal ah booliiskuna ay rumeysan yihiin inuu awood u leeyahay inuu dilo ama uu ahaado dhibane dil?” Ayuu yiri. Waa xaalad aad u xun mararka qaarna ma jiraan wax lagu beddelo, ayuu yidhi.
Booliska Iswiidhan ayaa bilaabay hawlgal amni oo loogu magac daray Operation Portia, kaasoo bilaabmay kadib markii ay kordheen tirada dilalka xagaagan.
Ujeedada Howlgalka Portia wuxuu ahaa in la isku dayo in la jebiyo meertada rabshadaha .. Inta u dhaxeysa 50 ilaa 100 qof ayaa lagu kormeeray deegaanka fal dambiyeedka, waxaana la aqoonsaday dhalinyaro dambiilayaal burcad ah oo u baahan waxqabad deg deg ah
Taliyaha Booliska ayaa yiri, “Waxaan awoodnay inaan kala saarno dhalinyarada ka mid ah kuwa halista ku jira, dhalinyarada wadada ugu jirta inay galaan dambiyo aad u culus, iyo dhalinyarada qarka u saaran inay galaan dambiyo culus oo rabshado wata, waxaanna macluumaadkaas ugu gudbineynaa adeegyada bulshada qaab ahaan warbixinnada. “
Da’da carruurta yar yar, ee la aqoonsaday, waxay u dhexeeyaan 14-15 sano. Mararka qaarkoodna waxaa kaloo jiray carruur yaryar.
Taliyaha booliska Stephan Kiernan ayaa tixgaliyay in si loo joojiyo askareynta caruurta ee kooxaha gaangiska ah, booliska waa inuu lashaqeeyaa iskuulada, adeega bulshada iyo dowlada hoose.
In kasta oo dadaallada la sameeyay, Gobolka Stockholm wuxuu jabiyay rikoor ku saabsan tirada toogashada sanadkii la soo dhaafay iyada oo 156 dhacdo.
Sannadkan gudihiisa, Stockholm waxaa ka dhacay 13 dhacdo oo toogasho ah.
