Baarlamaanka Sweden ayaa Isniintii dib u doortay Andreas Norlén oo ka tirsan Xisbiga Moderaterna (Conservatives) inuu mar kale noqdo Guddoomiyaha Baarlamaanka (Riksdag).

Norlén ayaa helay 200 cod, halka musharraxaddii Xisbiga Social Democrats, Johanna Haraldsson, ay heshay 146 cod. Codbixintu waxay ahayd mid qarsoodi ah oo ay ka qayb qaateen xubnaha baarlamaanka.

Intaas ka dib, baarlamaanka ayaa Johanna Haraldsson u doortay inay noqoto Guddoomiye-ku-xigeenka koowaad, waxaana lagu ansixiyay cod afka ah oo aan ahayn cod-bixin qarsoodi ah.

Dib-u-doorashada Norlén ayaa timid kadib markii Xisbiga Bidixda (Vänsterpartiet) uu ku dhawaaqay inuu taageerayo, taasoo ka dhigan in taageerada uu helay ay ka timid xisbiyada ku jira heshiiska Tidö iyo sidoo kale Xisbiga Bidixda.

Xisbiga Moderaterna ayaa horay u magacaabay Norlén si uu xilka u sii wato, waxaana taageeray Sweden Democrats (SD), Christian Democrats (KD) iyo Liberals (L). Xisbiga Bidixda ayaa markii dambe isna sheegay inuu codkiisa siin doono Norlén.

Andreas Norlén ayaa xilka Guddoomiyaha Baarlamaanka Sweden hayay tan iyo 2018.