Wasiir ku xigeenka Warfaafinta Xukuumada Somalia C/raxmaan Yusuf Al-Cadaala oo shir jaraa’id ku qabtay Muqdisho ayaa sheegay in ku dhowaad 100 dagaalyahan oo ka tirsan Al shabaab lagu laayey dagaal ka dhacay degaanka Juxaay oo ka tirsan gobolka Sh/dhexe.
Dagaalkan ayuu Wasiirku sheegay inuu dhacay maanta ka dib markii ciidamada DF oo taageera ka helaya dayuuradaha Droneska Mareykanka iyo dadka degaanka ay weerareen Dagaalyahano ka tirsan A-shabaab oo isku urursanayey degaanka Juxaay oo ku dhow Guulane.
“Howlgallo qorsheysan oo qeybaha kala duwan ee ciidamada iyo saaxiibada caawiya Soomaaliya ay ka fuliyeen macaashka Muxudiin Miiney ee deegaanka Juxaay Gobolka Shabeellaha Dhede waxay ku dileen qiyaastiio boqol ka tirsan kooxda khawaarijta alshabaab” ayuu yiri wasiir Cadaala.
Howlgalkan ayuu sheegay in lagu xasuuqay saraakiil iyo maleeshiyaad ka tirsan Al-shabaab.
“Ilaa hadda waxaan xaqiijinay in dagaalka lagu dilay 88 xubnood oo ka tirsan khawaarijta, meydadkoodu waxay daadsan yihiin dhul banaan oo ku yaala degaanka Juxaay weli ciidamadu waxay wadaan ogaadaan khasaaraha cadowga oo tirobeel noqday, meydad cusub ayaana laga helayaa howdka” ayuu yiri Wasiir cadaala oo aan sheegin khasaaraa ciidamada ka soo gaaray dagaalkii maanta
Maamulka Hirshabelle ayaa isna bogaadiyey howlgalka ciidaamada DF iyo saaxiibada caalamiga ah ka fuliyeen degaanka Juxaay
“Dowladda Hirshabeelle waxa ay bogaadineysaa guulaha muhiimka ee ay soo hoyiyeen ee Ciidamada Xoogga dalka, Ciidamada Booliiska Hirshabeelle iyo Ciidamada dib u xureynta deegaanka oo cadowga ka xureeyay deegaano iyo dagmooyin ka tirsan Dowladda Hirshabeelle” ayaa lagu yiri qoraal ka soo baxay maamulka Hirshebelle.
