Maxkamadda Gobolka Västmanland ayaa xukun xabsi daa’in ah ku ridday nin 63 jir ah kadib markii lagu helay dambiga dilka xaaskiisa, Fahiima, oo lagu weeraray bannaanka gurigeeda ee xaafadda Södra Gryta ee magaalada Västerås bishii Nofeembar 2025. Sidoo kale, maxkamaddu waxay ku heshay dambiga weerar culus oo uu u geystay wiilkooda qaangaarka ah.
Falku wuxuu dhacay fiidnimadii 3-da Nofeembar, markaas oo ninku xaaskiisa ku dhuftay mindi dhowr jeer, iyadoo mid ka mid ah dhaawacyada uu si toos ah u gaaray wadnaha, taasoo sababtay geerideeda. Wiilkoodana wuxuu soo gaaray dhaawacyo halis ah intii uu weerarku socday.
Maxkamaddu waxay sheegtay in dilka uu qayb ahaan ku salaysnaa waxa loogu yeero “sharaf”, iyadoo lagu sheegay in eedaysanuhu uu falka u geystay si uu u ilaashado sharaftiisa ama tan qoyskiisa.
Garsoore Sakari Ålander ayaa war-saxaafadeed ku sheegay in la caddeeyay in ninku uu si adag u maamuli jiray xaaskiisa, isla markaana uusan aqbali karin go’aankeeda ah inay joojiso wada noolaanshaha.
Ninkan ayaa hore loogu xukumay shan bilood oo xabsi ah in ka badan toddobo bilood ka hor dilka, kadib markii lagu helay inuu xaaskiisa garaacay isla markaana ku dhuftay qalabka lagu xidho kabaha.
