Maxkamada Racfaanka gobolka Galgaduud ee maamulka Galmudug oo maanta fariisatay racfaankii ay dhawaan soo qaateen qareenada difaacaya rag ku eedeysan iney dileen Hooyo iyo sadex gabdhood oo ay dhashay ayaa ku xukuntay dil toogasho ah.

Dilka loo geystay Hooyada iyo sadaxdeeda gabdhood ayaa ka dhacay tuulo hoostagta deegaanka Qaayib ee gobolka Galgaduud, waxaana horay ragaani dil toogasho ah ugu soo xukuntay Maxkamada ciidamada ee gobolka Galgaduud.

Maxkamada racfaanka gobolka Galgaduud ayaa dhagaysatay doodaha qareennada difaacayay eedeesanayaasha, caddeymaha xeer ilaalinta iyo marqaatiyaal la horgeeyay, waxaana taasi ay keentay in ragaani lagu xukumo dil toogasho ah oo qisaasta hooyada iyo sadaxdeeda gabdhood.

Ragga Maxkamadda Racfaanka ku riday Xukunka dilka toogasho ah ayaa kala ah  Cabdi Cismaan Cabdullaahi iyo Galad Axmed Xuseen, halka sano oo xabsi ah ay Maxkamaddu ku riday Ayuub Maxamed Cabdi.

Maxkamadda Racfaanka ayaa Gunaanadka fadhiga shaacisay in xukunkaan uu yahay mid cadaalad u horseeda qoyska dhibanayaasha iyo guud ahaan bulshada kale ee ku nool deegaanada maamulka Galmudug.

Ugu dambeyntii deegaanada maamulka Galmudug ayaa ka mid ah meelaha ugu badan oo ay ka dhacaan dilalka ku saleysan aanooyinka qabiilka, kuwaas oo gaaray heerkii ugu xumaa abid ee ah in la beegsado haweenka iyo caruurta.