Wararka naga soo gaaraya gobolka Shabeellaha Dhexe ayaa sheegaya in maleeshiyada ururka Al-Shabaab ay weerar culus ku qaadeen saldhig ay ciidamada xoogga dalka Soomaaliya ku leeyihiin deegaanka War-gaadhi, oo ku yaalla bariga gobolkaas.

Weerarka oo la sheegay inuu billowday saaka aroortii hore ayaa lagu soo warramayaa in uu ku furmay gaari laga soo buuxiyay walxaha qarxa, taasoo kaddib keentay dagaal fool ka fool ah oo weli socda.

Wararka horudhaca ah ayaa intaa ku daraya in kooxda weerarka qaaday ay la wareegeen qeybo ka mid ah deegaanka War-gaadhi, gaar ahaan agagaarka ceelka Ceel-ciid. Sida ay sheegayaan ilo deegaanka ah, dagaalka ayaa ah mid aad u culus, iyadoo labada dhinac ay weli is weydaarsanayaan rasaas culus.

Saraakiisha dowladda ayaan weli si rasmi ah uga hadlin weerarka, iyadoo aan la xaqiijin karin khasaaraha ka dhashay dagaalka ilaa iyo hadda.