Madaxweynaha Mareykanka, Donald Trump ayaa Talaadadan sheegay in wada hadal wax ku ool ah uu la yeeshay Raysal Wasaaraha Israel, Benjamin Netanyahu.
Madaxweynaha Mareykanka ayaa khadka teleefanka kula hadlay Raysal Wasaaraha Israel, waxaana uu sheegay in labada hoggaamiye ay isku dhinac ka yiiin arrin kasta, sida uu ku sheegay qoraal uu ku daabacay bartiisa Truth Social.
Madaxweyne Trump ayaa qoraalkiisa ku xusay in isaga iyo Netanyahu ay ka wada hadleen arrimo ay ka mid yihiin ganacsiga iyo Iran.
“Wada hadalkayaga si wanaagsan ayuu u dhacay, waxaana isku dhinac ka nahay arrin kasta.” Ayuu yiri Trump.
Trump ma soo hadal qaadin in isaga iyo Netanyahu ay ka wada hadleen xaaladda murugsan ee ka jirta Marinka Gaza.
Wada hadalkan ayaa imanaya, xilli Golaha Wasiirada Israel ay caawa ka wada hadlayaan heshiis ay suurtagal tahay in lala galo Xamaas.
Warbaahinta Israel ayaa warineysa in Xubnaha Golaha Wasiirada ay si dhow uga wada hadlayaan heshiis ay tahay in lagu soo celiyo maxaabiista Israeliyiinta ee lagu haysto gudaha Gaza.
Warbaahinta maxaliga ayaa sheegeysa in heshiiskan uu horseedayo in xabad joojin laga sameeyo Marinka Gaza iyo in la sii daayo qaar badan oo ka mid ah maxaabiista Falastiiniyiinta ee ku xiran xabsiyada Israel, inkastoo Wasiirada qaarkood ay diidan yihiin in la joojiyo amaba la soo afjaro dagaalka Gaza.
Trump ayaa la fahamsan yahay in si uun uu uga walaacsan yahay colaadda Gaza, waxaana la xusuustaa maalmo ka hor inta aanu xafiiska la wareegin in uu u ololeeyay heshiiskii xabad joojinta ee 19-kii bishii January ka dhaqangalay Gaza.
Trump ayaa ololihiisii dib-u-doorashada ee bishii November ku ololeynayay in uu soo afjari doono dagaalka Gaza iyo kan Ukraine, isla-markaana uu dunida ka dhigi doono meel ammaan ah.
Trump ayaa la sheegaa in weli ay miiska u saaran tahay, sidii uu u soo afjari lahaa dagaalka Gaza, laakiin ay dhibaato ka haysato galaangalka ay Israel ku leedahay siyaasadda Mareykanka, taasoo ku riixeysa in uu wax badan xeeriyo, isla-markaana aanu culeys muuqdo saarin siyaasiyiinta Israel.
Mareykanka ayaa dagaalka Gaza kala kulmay cambaareyntii ugu weyneyd ee muddo tobanaan sano ah loo jeediyo.
Bulshada caalamka oo kuwa Mareykanka ay qayb ka yihiin ayaa si weyn uga soo horjeeda dembiyada dagaal ee ka dhacaya Marinka Gaza.
Dagaalkan ayaa sidoo kale suurad xumeeyay muuqaalkii Israel ee dunida.
