Wararka naga soo gaaraya gobolka Galgaduud ayaa xaqiijinaya in xalay lagu dilay Alle ha u naxariistee Sade Daahir Caanood Gulaafe, taliyihii hore ee ilaalada khaaska ah ee Madaxweyne ku-xigeenka Galmudug.
Marxuumka ayaa lagu beegsaday weerar ay fuliyeen koox hubeysan xilli uu marayay wadada isku xirta Caabudwaaq iyo Balanbale, gaar ahaan degaanka Ceelasha.
Sade Daahir ayaa la socday gaari ay wateen dad kale, waxaana weerarka uu sidoo kale dhaawac culus ka soo gaaray mid ka mid ah dadka la safrayay, kaasoo si degdeg ah loogu qaaday isbitaalka degmada Caabudwaaq.
Kooxdii falka geysatay ayaa goobta ka baxsaday, waxaana la rumeysan yahay in dilkan uu xiriir la leeyahay silsilad aanooyin qabiil ah oo muddooyinkii dambe ka socday deegaannada Galmudug, gaar ahaan agagaarka Balanbale iyo Caabudwaaq.
Intaa kaddib, waxaa la dilay Bashiir Cabdiqaadir Cali, taasoo sii hurisay xiisadda deegaanka.
Dhammaan dhacdooyinkan ayaa sare u qaaday cabsi laga qabo in colaado qabiil ay si buuxda uga holcaan gobolka.
Ciidamada Galmudug ayaa bilaabay baaritaanno la xiriira dilalkan, waxaana socda dedaallo lagu raadinayo kooxaha weerarrada geystay.
