Wasiirkii hore ee Wasaaradda Gaadiidka iyo Duulista Hawada Xukuumadda Fedaraalka Soomaaliya Fardowso Cismaan Cigaal ayaa ku sheegtay sababta keentay iney yaraadaan qaraxyadii ka dhici jiray Magaalada Muqdisho in gaadiidka lagu qasbay xirashada sumadda u gaarka ah (Taarikada).
Waxay sidoo kale tilmaamtay in sidoo kale baraha hubinta gaadiidka la geeyay agab casri ah oo lagu hubiyo gaadiidka isaga kala gudbaya Muqdisho dhexdeeda kaasoo lagu xaqiijiyo gawaarida diiwaangashan ee soo maray nidaamka Wasaaradda Gaadiidka iyo Hawada.
“Qaraxyadii ka dhici jiray Muqdisho waxaa ku yareynay Gaadiidka ayaan diiwaangelinay oo taariko ku xirnay, Muqdisho way adag tahay in maanta uu maro gaari aan summad lahayn, awalna kuwo badan oo sumad laheyn ayaa yaaci jiray gudaha magaalada Muqdisho, kuwaas oo caqabad ku ahaa amniga guud ee Caasimadda” ayay tiri Fardowsa Cismaan Cigaal Wasiirkii hore ee Wasaaradda Gaadiidka iyo Duulista Hawada Soomaaliya.
Fardowso Cismaan ayaa xustay in labadii sano iyo dhowrkii bilood ay joogtay Wasaaradda iney xoogga saartay wadashaqeynta dowladda Federaalka iyo dowlad goboleedyada, gaar ahaan mideynta sumadaha kala duwan ee gaadiidka oo caqabado badan ku qabay dhinaca ka gudubka Xuduudaha.
Hadalkaan kasoo yeeray Fardowso Cismaan Cigaal ayaa kusoo aadaya, iyadoo bilahii lasoo dhaafay amniga guud ee Muqdisho uu ahaa mid aad u wanaagsan, waxayna hadalkaan ka sheegtay munaasabad ay xilka ku wareejineysay Wasiirka cusub ee Wasaaradda Gaadiidka iyo Duulista Hawada Maxamed Faarax Nuux.
